“Bizim oyunlar final əhəmiyyəti daşıyır. Hər matça son qarşılaşma kimi hazırlanırıq".
Prosport.Az xəbər verir ki, bunları “Sərhədçi”nin baş məşqçisi Evren Alkaya Azərbaycan Basketbol Liqasının XI turunda “Şəki”ni 112:82 hesabı ilə məğlub etdikləri görüşdən sonra deyib.
Türkiyəli mütəxəssis “Şəki”nin basketbola yeni qədəm qoyan şəhər komandası olduğunu bildirib: "Federasiya ilə birlikdə yaxşı işlər görürlər, çalışırlar. Düzdür, bir az uğursuz matçlar keçirirlər, oyunları şanssız olur. Ümid edirəm ki, gələcəkdə daha yaxşı oyun göstərəcəklər, gözəl oyunları ilə hər kəsi sevindirəcəklər. Onlara uğurlar arzulayıram.
Matça gəlincə, başlanğıc templi oldu. Hərəkətli oyun idi. Təkbətək təzyiq etdik, rəqib qısa zonada daha yaxşı olmağa çalışırdı. Bizim oyunçular bu həftə öndə daha sıx oynamağı məşq etdiyinə görə nəticə oldu. Çox top aldıq, sürətli hücumlarımız oldu, 2-ci şansa çox şərait yaratmadıq. İstər hücumda, istərsə də müdafiə olunarkən yaxşı oynadıq. İlk hissədə nəticəni aldıq. Zədəsiz qələbə əldə etdik. Rəqibin çox atış etməsinə mane olduq. Bundan sonrakı matçlara hazırlaşacağıq”.
Evren Alkaya komandanın yeni transferlərini də dəyərləndirib: “Yeni transferlər komandaya sürət qatmaq üçün gətirildi. 2 hücumçu heyətə qatdıq, onlardan 1-i hazırda zədəlidir. Digəri isə meydanda yaxşı işlər görür. Problemli yerləri təcrübəli oyunçularla sığortalamağa çalışırıq. Ribaundlarda istədiyimizi etdik. Hücumda düşündüklərimizi etməyə başlamışıq. Tam komplektləşmək üçün zamana ehtyacımız var. Hər şeyi tamamilə dəyişdirdik. Daha 10-15 günə ehtiyacımız var. Azərbaycan Kubokuna qədər matçlarda istədiyimiz əldə etsək, bundan sonra daha yaxşı olacağıq”.
"Şəki"nin "sükanı arxasında" olan nigeriyalı baş məşqçi Aleksander Uco oyuna pis başlamadıqlarını söyləyib: "Amma sonradan müdafiədə yaxşı oynaya bilmədik. Çoxlu səhvlər buraxdıq və rəqib böyük fərq yaratdı. Halbuki son 20 dəqiqə bizim üçün pis keçməmişdi. Bizim əsas oyunçumuz zədəlidir və oyunu buraxırdı. Onun yoxluğu təsirsiz ötüşmədi. Yeni komandamız var. Ümid edirəm, vəziyyətdən çıxa biləcəyik".