"Açığını deyim ki, oyundan tam razı qalmadım. Qələbə qazansaq belə, oyunçularımın çıxışı məni o qədər də qane etmədi”.

Prosport.Az xəbər verir ki, bunu "Neftçi" basketbol klubunun baş məşqçisi Anar Sarıyev deyib.

Mütəxəssis Azərbaycan Basketbol Liqasının XI turunda "Cəlilabad" üzərində 72:63 hesablı qələbəni şərh edib. Sarıyev bildirib ki, komandası meydanda istədiyi oyunu nümayiş etdirmir: “Kiminsə oyunu haqda nəsə demək istəmirəm, ancaq komanda olaraq oyuna tam hazır deyilik. Səbəbini bilmirəm. Məşqi də yaxşı keçirik, orada hamı oynamaq istəyir, oyunda isə komanda kimi istədiyimizi tam şəkildə göstərə bilmirik. Ancaq yenə də çalışacağıq. Növbəti turda Şəkiyə səfər edəcəyik. Şəhərin eyniadlı komandasının qonağı olacağıq.

Uşaqlara birgünlük istirahət vermişəm, cümə günündən isə yenidən məşqlərimizə davam edəcəyik".

Qeyd edək ki, “Neftçi” XI turdan sonra topladığı 18 xalla turnir cədvəlinin 4-cü pilləsində qərarlaşıb.