"Neftçi"nin yeni transferi Alfa Konte klub televiziyasına müsahibə verib.

Prosport.Az xəbər verir ki, syerra leoneli vinger ilkin təəssüratlarını bölüşüb. 23 yaşlı futbolçu "Neftçi"ni seçməsi haqda fikirlərini bildirib:

"Təəssüratlarım çox yaxşıdır. Düşünürəm ki, mənim üçün çox yaxşı təcrübə olacaq. Burada yaxşı atmosfer var. İlk dəfədir ki, bu şəhərdə oluram. Amma səmimi deyim ki, çox gözəl şəhərdir. "Neftçi" çox yaxşı klubdur. Sadəcə, düşüncələrim mənə dedi ki, get. Fikirləşdim ki, mənim üçün ən yaxşısı budur. Yəni, düşüncələrimin arxasınca getdim. İnandım ki, bu mənim üçün yaxşı təklifdir və bunu qəbul etməliyəm".

Alfa Konte "Neftçi"yə keçməmişdən əvvəl bir zamanlar "ağ-qaralar"ın heyətində çıxış etmiş həmyerlisi Culius Vobayla məsləhətləşdiyini bildirib. O, sonda azarkeşlərə səslənib:

"Bəli, Culius Vobayla telefon vasitəsilə əlaqə saxlamışam. O mənə komanda haqqında çoxlu xoş sözlər deyib. Fikirləşirəm ki, onun sözləri buraya gəlmək və bu möhtəşəm kkubla tarix yazmaq üçün məni daha da həvəsləndirdi. Burada əsas məqsədim "Neftçi" ilə tarix yazmaq, azarkeşləri sevindirmək, komanda ilə birlikdə daha böyük uğurlara imza atmaqdır. "Neftçi"nin son 5, 6, 7 ili ilə bağlı məlumatım var. Klub haqda eşitmişəm. Bu komanda ilə tarix yazmaq niyyətindəyəm. Əlimdən gələnin ən yaxşısını etmək istəyirəm ki, komanda layiq olduğu səviyyəyə çatsın və azarkeşləri sevindirsin. Azarkeşlərə demək istəyirəm ki, Alfa buradadır. Mən bura tarix yazmağa gəlmişəm. İnanıram ki, biz birlikdə çox sevinəcəyik. Sadəcə, gözləyin".