“Sumqayıt”ın baş məşqçisi Samir Abasov bu gün Özbəkistan “Soqdiana” klubu ilə keçirilən yoxlama oyunu və təlim-məşq toplanışı barədə fikirlərini bildirib. 

Prosport.Az xəbər verir ki, o, klubun rəsmi saytına açıqlamasında deyib:

“Plana uyğun olaraq bu gün Antalyada son yoxlama oyunumuzu keçirdik. Hava şəraitinə görə oyunun təxirə salınacağından narahat idik, amma, şükürlər olsun ki, oyun baş tutdu və proqramımızdan kənara çıxmadıq. Bu gün bəzi oyunçuları onlara yad olan mövqelərdə yoxladıq. Bu da yoxlama görüşlərinin özəlliklərindən biridir. Uşaqlar da oyuna tam köklənmişdi. Düzdür, bir sıra səhvlərimiz də oldu. Lakin toplanış boyu fiziki yüklənmələrin olduğunu, oyunun gedişatı zamanı verilən tapşırıqları nəzərə alsaq, hər şey normaldır.

Ümumi toplanış barədə onu deyə bilərəm ki, hər şey ürəyimizcə oldu. Komandamdan razı qaldım. Uşaqlar məşqlərdə əllərindən gələni, hətta daha da artığını etdi. Artıq sabah Vətənə yola düşürük. Növbəti turda “Qəbələ” ilə qarşılaşacağıq ki, bu oyuna da hazırlaşmağa bir xeyli vaxtımız var”.

Qeyd edək ki, "Sumqayıt" ilk yoxlama oyununda Rumıniya təmsilçisi “Hermanştadt”a 0:3 hesabı ilə uduzub, 2-ci oyunda  Özbəkistan təmsilçisi “Soqdiana”ya qalib gəlib – 3:1.