Atletika (200 metr məsafəyə qaçış) üzrə dünya və Avropa çempionu Ramil Quliyev Antalyada “Neftçi" ilə bir hoteldə qalıb.

Prosport.Az xəbər verir ki, bu səbəbdən "Neftçi TV" 33 yaşlı sprinterdən müsahibə alıb. Sualların cavabını təqdim edirik:

– İllər sonra üzvü olduğum komanda ilə yenidən görüşmək mənə çox xoş oldu. Bu mənim üçün çox fərqli bir duyğudur.

– Burada bir çox komandalar təlim-məşq toplanışı keçirir. Tək futbol deyil, digər idman növlərindən olan idmançıları da görmək olar. Köhnə komandamı burada görməkdən məmnun oldum. Vaxtımız olanda komanda üzvləri ilə danışıb söhbətləşirik.

– Bakıda olanda bir neçə dəfə “Neftçi”nin oyunlarına getmişəm. Açığı desəm, stadiondan matçları izləməyə çox vaxtım olmurdu. Ya məşqlərdə olurduq, ya da yarışlarda iştirak edirdik. Hazırda “Fənərbağça” klubunu təmsil edirəm. Elə İstanbula gedəndə də, matçlara getməyə çox vaxtım olmur. İmkan olanda, çalışıram ki, böyük oyunları canlı izləyim.

– Açığı deyim ki, qatı futbol azarkeşi deyiləm, amma böyük oyunları, derbiləri izləməyi sevirəm. Bəlkə atlet olmasaydım, futbolçu ola bilərdim. Hansı idman növü ilə məşğul olmağının elə də böyük fərqi yoxdur. Əsas olan odur ki, özünü xoşbəxt hiss edəsən. Futbolda hansı mövqedə oynaya biləcəyimi isə zənnimcə məşqçi deməlidir. Amma harada sürətli olmaq lazımdırsa, məncə, məni orada oynadardılar.

– Bütün azarkeşlərə demək istəyirəm ki, komandanıza dəstək verməklə yanaşı, çalışın ki, siz də idmanla məşğul olasınız. Siz də idmançı olun, idmanı həyatınızın bir parçasına çevirin.

Daha sonra Türkiyəni təmsil edən azərbaycanlı atlet "Neftçi"nin sağ cinah müdafiəçisi Ervin Kofi ilə gücünü sınayıb. Ramil Quliyev fransalı futbolçudan üstün olub.