“Qəbələ”nin futbolçusu Kleziu Mozambik milli komandasında növbəti oyununu keçirib.

Prosport.Az xəbər verir ki, “qırmızı-qaralar”ın bu il heyətinə qaytardığı 29 yaşlı yarımmüdafiəçi Afrika Millətlər Kubokunda meydana çıxıb.

O, qrup mərhələsinin I turunun Misirlə görüşünün ikinci hissəsində oyuna daxil olub. Kleziu 58-ci dəqiqədə vurduğu qolla komandasını hesabda önə çıxarıb – 2:1. Lakin rəqib komanda Məhəmməd Salahın 90+7-ci dəqiqədə vurduğu penalti zərbəsi ilə hesabı bərabərləşdirib – 2:2.

Bu, Kleziunun Mozambik millisində 50-ci matçı olub. O, yığmada 9-cu qoluna imza atıb.

Qeyd edək ki, Mozambik və Misir millilərinin yer aldığı B qrupunda Kabo Verde ilə Qana yığmaları da mübarizə aparır. Bu komandaların görüşündə gözlənilənin əksinə olaraq, Kabo Verde millisi qalib gəlib – 2:1. 1-cilərin heyətində çıxış edən "Qarabağ"ın mərkəz yarımmüdafiəçisi Patrik Andradi sonadək ehtiyatda qalıb.

"Neftçi"nin futbolçusu Ataa Caberə də Asiya çempionatında oynamaq qismət olmayıb. O, Fələstin millisinin İrana 1:4 uduzduğu görüşdə ümumiyyətlə heyətə salınmayıb.