Türkiyə I divizionunda çıxış edən azərbaycanlı futbolçular II dövrəyə uğurlu start verib.

Prosport.Az xəbər verir ki, "Turan Tovuz"dan 200 min avro qarşılığında "Manisa"ya keçən Sərtan Taşqın debüt edib.

O, millimizin hücumçusu Ramil Şeydayevin 1,5 illiyə anlaşdığı və 2-ci pillədə gedən "Kocaelispor"la ev matçına start heyətdə çıxıb. Onun sağ cinah müdafiəçisi kimi 90 dəqiqə çıxış etdiyi oyunda "Manisa" güclü rəqibini 2:1 məğlub edib.

Günün son qarşılaşmasında isə millimizin futbolçusu Coşqun Diniyevin çıxış etdiyi "Ümraniyəspor" öz meydanında "Gənclərbirliyi" ilə 1:1 oynayıb. Komandanı məğlubiyyətdən xilas edən qolda mərkəz yarımmüdafiəçisi kimi çıxış edən Diniyevin rolu olub. O, 79-cu dəqiqədə sol cinahdan yerinə yetirdiyi künc zərbəsindən sonra Mustafa Əsər fərqlənib. Bu, Coşqunun 2-ci məhsuldar ötürməsi (daha 3 dəfə isə qol vurub – red.) olub.

Bəxtiyar Həsənalızadənin çıxış etdiyi "Tuzlaspor" isə səfərdə "Çorum"a 1:2 hesabı ilə uduzub. Mərkəz müdafiəçisi olan Bəxtiyar sonadək ehtiyatda qalıb.

Qeyd edək ki, hazırda "Ümraniyəspor" 23 xalla 9-cu, "Manisa" 22 xalla 11-ci və "Tuzlaspor" 16 xalla 16-cıdır.