Qadın voleybolçular arasında Azərbaycan çempionatında növbəti oyun keçiriləcək.

Prosport.Az xəbər verir ki, sabah qadın voleybolçuların Yüksək Liqasında II dövrə çərçivəsində VIII turun “Gəncə” – UNEC qarşılaşması baş tutacaq.

İndiyədək ev oyunlarını Gəncə Olimpiya İdman Kompleksində (OİK) keçirən “Gəncə” klubu bu dəfə rəqibini Tovuz OİK-də qəbul edəcək. Oyun saat 16:00-da başlayacaq.

Bildiyimiz qədəri ilə, Gəncə OİK-də hər şey qaydasındadır. Bəs niyə "Gəncə" ev oyununu doğma azarkeşlərin önündə oynamaqdan imtina edib? Federasiyadan Prosport.Az-ın sualına cavab olaraq bildirilib ki, buna səbəb regionlarda voleybola marağın formalaşdırılmasıdır. "Gəncə" və ya digər klubların gələcəkdə də ev oyunlarını digər şəhər və rayonlarımızda keçirməsi istisna olunmur.

Onu da bildirək ki, Gəncə OİK-dən "Gəncə" basketbol klubu da yararlanır.

Qeyd edək ki, futbolda "Kəpəz" Premyer Liqada ev oyunlarını Tovuz şəhər stadionunda keçirir. Buna səbəb Gəncə şəhər stadionunun təmirdə olmasıdır.