“Sabah”ın keçmiş futbolçusu, "Şaxtyor"da çıxış edən Aleksey Kaşşuk Azərbaycana qayıda bilər.

Prosport.Az xəbər verir ki, 23 yaşlı yarımmüdafiəçinin xidmətində “Neftçi” və "Qarabağ" da maraqlıdır. Bu barədə Xorvatiya mətbuatı məlumat yayıb.

Bakı təmsilçisinin ukraynalı futbolçuya cəlbedici təklif göndərdiyi iddia olunur. “Neftçi” ilə yanaşı, Xorvatiyanın “Xayduk” klubu da Kaşşuku transfer etmək üçün mübarizə aparır. Xorvatlar hələ yaydan bu futbolçunu istəyir.

Çünki Kaşşuk hələ yayda Ukrayna U-21-i ilə Avropa çempionatında Xorvatiyaya 2:0 qalib gəldikləri matçda 2-ci qolu vurub. Messisayağı vurulan qol xorvatların çox diqqətini cəlb edib. Lakin yayda futbolçu müqavilə ilə məxsus olduğu "Şaxtyor"a qayıtmalı olub.

İndi isə futbolçunun Donetsk klubu ilə müqaviləsinin bitməsinə 6 ay qaldığından, futbolçunun başqa klublarla danışıqlar aparmasında qanuna zidd heç nə yoxdur.

Aleksey Kaşuk 2022-ci ilin mart ayından ötən ilin iyununadək “Sabah”da çıxış edib. O, Masazır təmsilçisinin heyətində meydana çıxdığı 41 rəsmi matçda 18 qol və 12 məhsuldar ötürmə ilə yadda qalıb.