“İlk növbədə məni inanaraq komandaya dəvət etdiyinə görə məşqçilər heyətinə təşəkkür edirəm. Bu mövsüm “Sabah”ın heyətində demək olar ki, oynamırdım, nadir hallarda meydana çıxırdım. Müqavilə ilə məxsus olduğum klub təcrübə qazanmağım üçün icarə əsasında da olsa özümü oynaya biləcəyim bir komandada sınamaq şansı yaratdı".

Prosport.Az xəbər verir ki, bunu "Araz-Naxçıvan"ın yeni üzvü Eldar Ələkbərov deyib.

Xəbər verdiyimiz kimi, Naxçıvan komandası “Sabah”ın rusiyalı yarımmüdafiəçisini mövsümün sonuna qədər icarəyə götürüb. Dünən “Zirə” ilə keçirilən yoxlama matçında da meydana çıxan futbolçu arazpfk.com-a ilkin təəssüratlarını bildirib: "Artıq bir neçə gündür “Araz-Naxçıvan”ın düşərgəsindəyəm. Təbii ki, yeni komanda və heyət üzvlərinin arasına düşmüşəm və uyğunlaşmaq üçün az da olsa zaman lazımdır. Uşaqlar yaxşı qarşıladılar, aralarında tanıdıqlarım da var. Atmosfer yaxşıdır, baxıram, hamı oynamaq istəyir, bunun üçün çalışır".

Rusiya doğumlu 21 yaşadək millimizin sabiq üzvü fiziki planda axsamalarının olduğunu etiraf edib: “Zirə” ilə yoxlama görüşündə fasilədən sonra oyuna qoşuldum. Hələ tam hazır deyiləm. Xüsusilə də fiziki planda axsamalar var. Oyundan sonra baş məşqçi ilə də söhbətimiz oldu, fikirlərini dinlədim. Əlbəttə, onun dedikləri çox önəmlidir. Elə etməliyəm ki, çempionatın bərpasına qədər çatışmazlıqları aradan qaldırım”.