Dünən xəbər verdiyimiz kimi, Naxçıvan Muxtar Respublikasına, əsasən Naxçıvan şəhərinə yağan leysan kənd təsərrüfatına, şəhərin infrastrukturuna, fərdi yaşayış evlərinə ciddi zərər vurmaqla yanaşı, nəqliyyatın hərəkətində də müəyyən çətinliklər yaratmışdı.

Ziyan çəkmiş infrastrukturlardan biri də Naxçıvan Muxtar Respublika stadionu idi. Bu üzdən bu gün stadionda I Divizionun son turu çərçivəsində "Araz Naxçıvan" – "Zaqatala" matçı və oyundan sonra vaxtından əvvəl çempion olmuş "Araz Naxçıvan"ın mükafatlandırma mərasiminin təxirə düşməsi təhlükəsi yaranmışdı.

Prosport.Az-ın Naxçıvana ezam olunmuş əməkdaşının verdiyi xəbərə görə, artıq stadion klub və Fövqəladə Hallar Nazirliyinin işçiləri sayəsində oyuna və tədbirə tam hazır vəziyyətə gətirilib. Bəzi xırda çatışmazlıqlar qalır ki, onlar da oyun saatına kimi aradan qaldırılacaq.

Xatırladaq ki, "Araz Naxçıvan" – "Zaqatala" matçı bu günsaat 16.00-da start götürəcək. Təltifetmə mərasimində isə Muxtar Respublikanın rəhbər şəxsləri ilə yanaşı, AFFA və PFL rəhbərliyi də iştirak edəcək.