"Mən oyunçularıma inanıram və bilirəm ki, onlar məqsədimiz üçün mübarizə aparacaq".

Prosport.Az xəbər verir ki, bunu 3x3 basketbolu üzrə qadın millimizin baş məşqçisi Ratomir Deliç Paris Yay Olimpiya Oyunlarına vəsiqə uğrunda təsnifat mərhələsi barədə danışarkən deyib.

Mütəxəssis turnirdəki bütün komandaların yaxşı kollektivlər olduğunu bildirib: "Şanslar eynidir. Ən çətin komandanı seçsəm, Niderlandı qeyd edə bilərəm. Onlar buraya Avropa çempionu kimi gələcək və kağız üzərində favorit olacaqlar. Amma idmanda bunun heç bir mənası yoxdur. Sən nəyə qadir olduğunu meydanda göstərməlisən və bu çox vacibdir. Bu səbəbdən yaxşı nəticə üçün əlimizdən gələni edəcəyik. Oyunçularıma inanıram".

Baş məşqçi yığmanın ölkəsi Serbiyada təlim-məşq toplanışı olacağını sözlərinə əlavə edib: "Ümid edirəm ki, komandanı hazırlaşdırmaq üçün martda bir neçə turnirdə iştirak edəcəyik. Bilirsiniz ki, ötən mövsüm qızlar bir yerdə oynamayıb. Bu səbəbdən yeni heyətlə oynayacağıq və yaxşı hazırlığa ehtiyacımız var".

Qeyd edək ki, millimizin qatılacağı ilk lisenziya turniri apreldə başlayacaq. 2-ci lisenziya turniri isə mayda Macarıstanın Debretsen şəhərində keçiriləcək.