Futzal millimizin üzvü Xətai Bağırovun Prosport.Az saytına müsahibəsi
– "Araz-Naxçıvan"ın baş məşqçisi Vitali Borisov braziliyalı Erik Danilu, siz və İsa Atayevin komandadan ayrıldığını bildirib...
– Vitali Borisovun sözləri mənim üçün önəm daşımır. Nə deyib, nə deməyib bilmirəm. Məşqçinin işi zaldadır. Mənim danışığım klub rəhbərliyi ilə olub. İsa ilə məni ötən mövsümün ilk 6 ayında oynadığımız Belçikanın Xent (Gent) şəhərini təmsil edən "Beşiktaş" komandası çağırıb. 3 illik oturum vizası almaq üçün klub bizə sənəd təqdim edib. Bizdə Belçika səfirliyi yoxdur. Bu səbəbdən Türkiyədəki Belçika səfirliyinə oturum almaq üçün müraciət etmişik. Əgər oturum ala bilsək, Belçika I divizionunun II dövrəsinin ortasından "Beşiktaş"a qoşulmalıyıq. "Araz-Naxçıvan" rəhbərliyinə də bildirmişik ki, indidən yerimizə oyunçu transfer edin ki, sonra çempionatda əziyyət çəkməyəsiniz. Sağ olsun klub rəhbərliyi də buna icazə verdi. Biz də oturumun cavabı gələnədək, Belçikaya gedənədək minifutbol çempionatında çıxış edəcəyik. Bildiyiniz kimi, mən "İnter"də oynayan məşqçiyəm. İsa da "Zirə" komandasındadır.
– Belçikada qış fasiləsi nə vaxt başa çatır?
– Azərbaycanla aralarında 2 həftə fərq var. Bizim çempionatdan 2 həftə sonra onlarda yarış başlayır. Bizimlə müqavilə 1+1 illik olacaq. Amma 3 illik oturum olduğunu nəzərə alsaq, elə bu 3 illik müqavilə deməkdir. Ötən mövsüm oynadığımız vaxtdan, 1 illik oturumumuz var. Ancaq onun vaxtı başa çatıb.
– Yeni klubunuz I divizionda çıxış edir. Elitaya çıxmaq üçün komandanın şansları var?
– Son illər çempionatı 2-ci yerdə bitirirlər deyə, Super Liqaya çıxa bilmirlər. Hazırda 3-cü yerdədirlər. Klub prezidenti türkdür. O, əsas növbəti mövsüm üçün bu transferləri edib. Belçika millisinin 2 oyunçusunu da növbəti mövsüm üçün heyətinə qatacağını deyib.
– Həm Belçika I divizionunda oynamağınız, həm də minifutbolda çıxış etməyiniz sizin milliyə çağırılmağınızı təhlükə altına atmır?
– Mən milli komanda üçün can qoymağa hazıram. Dəvət gələcəksə, işimizi yüksək səviyyədə görmək üçün milliyə qatılacağıq. Minifutbolun 90%-i də elə futzaldakı kimidir. Orada oynayıram ki, formamı qoruyub futzala qayıdım. Hazırda Moldovanın Super Liqasından təklifimiz də var. Çempionluğa oynayan komandadır. Bizi yarımmövsümlük müqaviləyə çağırır. Sadəcə, "Beşiktaş"a "ok" vermişik deyə, Moldovaya da gedə bilmirik.
– Yaxşı, ötən mövsüm "Beşiktaş"a keçidiniz necə baş tutmuşdu?
– 2019-cu ildə "Araz-Naxçıvan"la Çempionlar Liqasının elit mərhələsini Belçikada keçirirdik. Onların komandası ilə oyundan sonra (Belçikanın Hale şəhərində keçirilən həmin matçda təmsilçimiz "Hale-Xoyk"a (2022-ci ildən "Anderlext" olub) 1:5 uduzub və yeganə qolumuzu Xətai Bağırov vurub – red.) "Beşiktaş"ın 2-ci məşqçisi bizə yaxınlaşdı, türk idi, bizimlə şəkil çəkdirdi, formamızı aldı. Elə söhbət əsnasında dedi ki, Super Liqaya çıxmaq, gələcəkdə sizi də heyətimizdə görmək istəyirik. Ramiz Çovdarovu da istəyirdilər. Amma o indi Almaniyada yaşayır və orada oynayır deyə, təklifdən imtina etdi. Əvvəllər yaxşı formada olduğumuzdan, Belçikanın I divizionuna getmək istəmirdik. Ancaq indi fikrimiz odur ki, ailəvi Avropaya köçək. Ötən mövsüm oradan qayıtmağımızın səbəbi uşaqlarımıza oturum vizası verilməməyi oldu. İndi isə onlara da oturum ala biləcəyik. Çünki əvvəl 1 illik oturum vizamız olub.
– Vitali Borisovla münasibətləriniz necədir?
– Onunla heç bir problemim yoxdur. Amma icazəmi rəhbərlikdən almışam. Bəli, onunla əvvəl problemim olub. Bəzi oyunlarda məni meydana buraxmayıb, yalnız çətin durumda qalıb məcburiyyətdən məni oynadıb. Belə şeylərə görə aramızda soyuqluq olub. Amma nə federasiyanın baş katibi Mahmud Sadıqovla, nə də federasiya prezidenti Zaur Axundovla heç bir problemimiz olmayıb.
– Borisovla milli komandada da bir yerdə oynamısınız. Klubdan ayrılanda da sağollaşmadınız?
– Şəxsən belə sağollaşmadıq. Amma mənə də, İsaya da zəng edib uğurlar arzuladı.
– Son olaraq minifutbol barədə də soruşum. Veteran futbolçulardan qurulmuş "İnter"lə ilk turda qələbə qazandıqdan sonra bunun ardı gəlmədi. Veteranlar sözə baxmır?
– Sözə baxırlar (gülür). Onların çoxu məşqçi işləyirlər deyə bu baxımdan problem yoxdur. Sadəcə, cavanlıqda olan formalarında deyillər. Gücləri əvvəlki güc deyil, yaş öz sözünü deyir.
– İlk turda Kamran Ağayevin yerinə minifutbol millimizin qapıçısı Elmar Qasımov meydana çıxmışdı. Ağayevin sonrakı turlarda oynamaq imkanı olub?
– Yox, o hələ formada deyil. Kamran Ağayevlə Ruslan Abışov II dövrədən sonra oynaya biləcək.
Səbuhi Musa
