Azərbaycanlı şahmatçı Nicat Abbasovun dünya şahmat tacına Namizədlər Turnirində iştirakı reallaşmaq üzrədir.

Prosport.Az xəbər verir ki, norveçli Maqnus Karlsen Bakıda Dünya Kubokunun qalibi olsa da, chess.com saytına verdiyi müsahibədə Namizədlər Turnirində iştirak etməyəcəyini bildirib:

"Namizədlər Turnirində oynamayacağam. Bundan narahat olmayın! Dünya çempionluğu üçün matçlara qatılmamağımda əsas səbəb ondan həzz almamağımdır. Cavabı bu qədər sadədir".

Karlsen yanvarın 3-də öz X hesabında da FIDE-yə dəvət üçün təşəkkür etdiyini bildirməklə, bu yarışda çıxış etməyəcəyini bildirib.

Qeyd edək ki, dünya şahmat tacına Namizədlər Turniri 3-25 aprel tarixlərində Kanadanın Toronto şəhərində keçiriləcək. Maqnus Karlsenin iştirakdan imtinası ilə Dünya Kubokunda 4-cü olmuş Nicat Abbasov onun əvəzində yarışda mübarizə aparacaq.