"Xarı Bülbül" komandaları ilə bağlı yaranan problemlə bağlı onu deyə bilərəm ki, biz bütün komandalara dəstək göstəririk. Bu barədə federasiyanın rəsmi mövqeyi də məlumdur. Bilirəm ki, ictimaiyyəti də bu məsələ maraqlandırır. Biz heç bir komandaya ayrı-seçkilik etmirik. "Xarı Bülbül" komandasının yaxşı tarixçəsi var. Federasiyanın mövqeyi bəllidir. Hər komanda çempionatın əvvəlində mövsümə hazır olmalıdır. Yüksək Liqada oynayan kollektivlərə şərait yaradırıq. Bəzi işlərdə kömək göstəririk. Amma maddi məsələləri özləri planlaşdırırlar".

Prosport.Az-ın xəbərinə görə, bunu Azərbaycan Voleybol Federasiyasının prezidenti Şahin Bağırov deyib.

O, Faiq Qarayevin milliyə təyinatı ilə bağlı da danışıb: "Faiq müəllimin təyinatı federasiyanın kollegial qərarı ilə verilib. Onu tanıdığımızdan, Faiq müəllimin qarşısına müddət də qoymamışıq. Avropa çempionatı 2026-nın əvvəlində olacaq. Bu o deməkdir ki, Faiq Qarayev azı bu yarışadək baş məşqçi olacaq, həm də vitse-prezident kimi vəzifəsində qalacaq".

O, Gənclər və İdman Nazirliyinin ilin yekunları ilə bağlı səsverməsində voleyboldan heç kimin seçilməməsinə isə belə münasibət göstərib: "Nazirliyin ilin yekunları ilə bağlı tədbirində biz də iştirak edirdik. Təbii ki, biz də istərdik ki, orda adımız olsun. Amma demək olmaz ki, bizim yaxşı həkimimiz, hakimimiz yoxdur. Biz də başqa qurumların tədbirlərində mükafatlandırıla bilərik".

Federasiyanın vitse-prezidenti Bəhruz Quliyev də "Xarı Bülbül" məsələsi ilə bağlı fikrini bildirib: "Klub mövsümün əvvəlində bizə çempionatda iştirakla bağlı təsdiqedici sənəd təqdim edib. Onlar özləri maliyyələşəcəklərini göstəriblər. Buna baxmayaraq, bu problemlər yaranandan sonra biz öz gücümüzdən istifadə edərək onlara müəyyən köməklik göstərmişik".