"Ataman Güneyligilə millini çalışdırdığı üçün təşəkkürümü bildirirəm. Ona Avropa çempionatından sonra təşəkkürümü zəng edib çatdırmışam. Onun qızlarla münaqişə yaşaması barədə bir şey deyə bilmərəm. Qalmaqala qarışmaq istəmirəm, qruplaşma olduğuna da inanmıram. Məncə, anlaşılmazlıq olub". 

Prosport.Az-ın məlumatına görə, bunu qadın voleybol millimizin baş məşqçisi Faiq Qarayev deyib.

Faiq Qarayev təyinatından sonra yığma ilə bağlı bir neçə məsələyə aydınlıq gətirib: "1-ci və 2-ci yığma komanda formalaşdırmağı düşünürük. Aşağı yaş qrupları üzrə koordinator Şahin Çatma ilə bu barədə sıx əməkdaşlıq edəcəyik. 

Məşqçilər korpusu ilə bağlı planlarımız var. Müqaviləmin müddəti azı 1 il olmalıdır ki, bu müddətdə nəticə verə bilim. 2 kubalı legionerimiz "Rabitə"nin vaxtından milliləşdirilib. Nazirlikdən də bu barədə kömək istəyəcəyəm".

Faiq Qarayev maliyyə problemləri ucbatından dağılmaq təhlükəsi ilə üzləşən "Xarı Bülbül"ün durumu ilə bağlı da fikrini bildirib: "Hər klubun öz maliyyə mənbəyi olmalıdır. İstəmərik ki, bu klublar bağlansın. Ancaq bu maliyyə problemləri həll olunmalıdır. "Xarı Bülbül" avrokubokda çıxış etmiş komandadır. Çox istərdim ki, nazirlik də bu məsələdə dəstək olsun".