Azərbaycan Basketbol Liqasında (ABL) II dövrənin və Azərbaycan Kuboku oyunlarının təqvimi müəyyənləşib.

Prosport.Az-ın məlumatına görə, II dövrəyə turun mərkəzi görüşü ilə start veriləcək. 

Yanvarın 10-da keçiriləcək "Xəzri" – "Neftçi" matçı saat 19:30-da başlayacaq. Çempionatda II dövrəyə sonuncu – XVIII turda Xaçmaz Olimpiya İdman Kompleksində keçiriləcək "NTD-İndiqo" – "Şəki" oyunu ilə yekun vurulacaq. Bu matç 28 aprel saat 14:00-da baş tutacaq. Daha sonra çempionluq üçün keçiriləcək pley-off matçlarının tarixləri müəyyənləşdiriləcək.

Fevralın sonlarından martın ortalarınadək çempionatda fasilə olacaq. Buna səbəb fevralın 25-də millimizin Kosovo ilə oyununun olması və Azərbaycan Kuboku matçlarının keçirilməsidir.

Belə ki, 27 fevraldan etibarən Azərbaycan Kubokunda qrup matçlarına start veriləcək. İlk matç "Xəzri" və "Sumqayıt" arasında keçiriləcək. Kubokda qrup matçları düz 1 ay çəkəcək və 27 martda bu mərhələyə yekun vurulacaq. 30 martda yarımfinal görüşləri, 17-21 aprel tarixləri aralığında isə final oyunu keçiriləcək.

Qeyd edək ki, mövsümün gedişində federasiyanın İdarə Heyəti tərəfindən təqvimdə dəyişikliklər edilə bilər.