"Oyun bizim üçün çox yaxşı keçdi. Bütün uşaqlardan razı qaldım. 3 xallıq atışlardan məharətlə yararlanırdıq. Həmçinin yaxşı ötürmə verirdik. Basketbolçuların oyuna tam ciddi yanaşması məni sevindirir. Hesab o qədər də vacib deyil. Bu gün uğur qazandıq, amma sabah alınmaya bilər. Həm legionerlərdən, həm də yerli oyunçulardan razıyam".
Prosport.Az xəbər verir ki, bunu Xaçmazı təmsil edən "NTD-İndiqo" komandasının baş məşqçisi Tahir Baxşıyev deyib.
O, Azərbaycan Basketbol Liqasının IX turunun son oyununda səfərdə "Şəki" üzərində 120:54 hesablı qələbəni şərh edib. Baş məşqçi fikirlərini diqqətinizə çatdırırıq.
Tahir Baxşıyev ("NTD-İndiqo"nun baş məşqçisi): "4-cü periodda yerli oyunçulara şans verdik. Məni sevindirir ki, gənc basketbolçularımız artırır. Gənclərə şans verməliyik ki, sabah rahat meydançaya çıxıb oynaya bilsinlər. Oyun praktikası onların inkişafı üçün çox vacibdir. Təbii ki, matçın gedişi də imkan verməlidir ki, onları meydançaya buraxa bilim. Ancaq həmişə gənc yerli oyunçulara şans verməyə çalışıram.
Çempionatın ilk dövrəsini qiymətləndirsək, razı qaldım. Amma II dövrədə bizi ağır oyunlar gözləyir. Daha çox çalışmalıyıq, rahatlaşa bilmərik. Mövsüm üçün əsas məqsədə çatmalıyıq. Hesab etmirəm ki, bizim yalnız bir rəqibimiz var – "Sabah". "Xəzri" və "Neftçi" də kifayət qədər güclüdür. "Xırdalan"ı da qeyd etmək lazımdır. Düşünürəm ki, komandalar yeni oyunçularla güclənəcək. Pley-offa hələ vaxt və matçlar var. İndi pley-offa çıxmaq barədə düşünməliyik. Bundan sonra nə edəcəyimizi düşünəcəyik. II dövrə daha ağır keçəcək.
Komandanın gücləndirilməsi büdcədən asılıdır. Kimin büdcəsi imkan verirsə, güclənir. Hamı çempion olmaq istəyir. Bu barədə düşünürük, amma hələlik konkret bir şey yoxdur. Danışıqlar gedir".
Aleksander Uco ("Şəki"nin baş məşqçisi): "Həm hücumda, həm də müdafiə strategiyasında pis oynadıq. Halbuki bu baxımdan komanda ilə razılaşmışdıq və belə oynamağa söz vermişdik. Biz əslində çox sərt oynamadıq və oyunda aktiv qalmadıq. 19 xal itkisi və rəqibimizin bundan yararlanıb 33 xal toplaması güclü rəqabət aparmaq istəyən komanda üçün böyük geriləmədir.
66 xallı yüksək fərqlə niyə uduzduğumuzu göstərən statistik hesabatı sizə təqdim edə bilərəm. Həmçinin, ehtiyatdan meydana çıxan basketbolçular oyunumuzda yüksəliş edə bilmədi. Hər halda, biz hələ də ağır məşqlərə davam edib, hücum və müdafiə planında oyunumuzu düzəltməyə çalışacağıq".
Qeyd edək ki, çempionatda I dövrəyə məhz bu oyunla yekun vurulub. "NTD-İndiqo" 17 xalla "Sabah"la birgə çempionata şərikli liderlik edir. Heç bir qələbəsi olmayan və autsayder – 10-cu olan "Şəki" isə 9 xala malikdir.