Azərbaycan Premyer Liqasının XVIII turunda keçirilən “Neftçi” – “Kəpəz” matçından sonra klubun baş icraçı direktoru Fərrux Mahmudov, isveçli idman direktoru Yens Andeşon və komandanın yeni təyin olunan monteneqrolu baş məşqçisi Miodraq Bojoviçin iştirakı ilə mətbuat konfrans keçirilib.

Fərrux Mahmudov

– İlk dəfədir ki, ani təqdimat olur. Tələskənlikdəndir, yoxsa şəffaflıq?
– Təbii ki, şəffaflıqdır. Miodroq Bojoviç Bakıdadır. İstəyirdik ki, bunu hamı bilsin.

– Baş məşqçinin qarşısına hansı hədəf qoyulub?
– Hədəf ölkə kubokunu qazanmaq və minimum 2-ci yeri tutmaqdır.

– Adrian Mutu ilə yolların ayrılmasında nə həlledici rol oynadı?
– Qarşılıqlı fikir belə oldu. Mutunun anasını dünyası dəyişmişdi. Getməmişdən əvvəl onunla müzakirə etdik. Eyni fikrə gəldik ki, yeni baş məşqçi gəlsə, daha yaxşıdır.

– Namizədlər siyahısında yerli baş məşqçinin adı var idi?
– Xeyr, yox idi.

Miodraq Bojoviç

– "Neftçi" Azərbaycanda ən köklü və ən çox azarkeşə malik klubdur. Bura gələrkən nəyi araşdırdınız?
– Bilirəm ki, "Neftçi" Azərbaycanın ən yaxşı və böyük tarixə malik olan klubudur. Futbolda işləmək asan deyil. "Neftçi"də hansı hədəflərin olduğunu bilirəm. Qarşıya qoyulan məqsəd çempionatı minimum 2-ci bitirmək və kuboku qazanmaqdır. Buna nail olmaq üçün yaxşı futbol oynamaq lazımdır.

– "Neftçi"də sizə tanış olan bir çox futbolçular var. Rezuan Mirzov, Emin Mahmudov, Azər Əliyevi Rusiya Premyer Liqasından tanıyırsınız. Onlara lider kimi güvənəcəksiniz?
– Bəli, Rusiyada işlədiyim üçün bu 3 futbolçunu yaxşı tanıyıram. Hər üçü də keyfiyyətli oyunçulardır, nəyə qadir olduqlarını bilirəm. Hər gün özünü sübut etməlisən. Düşünürəm ki, bunun öhdəsindən gələ biləcəyik.

– Qışda tanıdığınız, bildiyiniz oyunçulardan kimisə gətirməyi planlaşdırırsınız?
– Mən komandaya hələ yeni gəlmişəm. Təbii ki, hər "transfer pəncərəsi"ndə komanda güclənməlidir. Yəqin ki, danışıqlar olacaq. Amma bunu rəhbərliklə və idman direktoru ilə danışacağıq. Bu haqda hələ heç nə deyə bilməyəcəyəm.

– Rusiya mətbuatına açıqlamanızda demisiniz ki, "Zenit" nə edirsə-etsin, xalqın komandası "Spartak"dır. Azərbaycanda da xalq komandası "Neftçi"dir, amma son vaxtlar "Qarabağ"ın uğurları var. "Neftçi"yə bu adı geri qaytara biləcəksiniz?
– Ümid edirəm ki, azarkeşləri yenidən tribunalara qaytaracağıq. "Neftçi"nin necə tarixi klub olduğunu yaxşı bilirəm, yaxşı dərk edirəm. Düşünürəm ki, yaxşı futbol oynasaq, azarkeşlər tribunanı dolduracaq.

Yens Andeşon: "İndiki məqamda "Neftçi"yə ən uyğun baş məşqçi olaraq məhz Bojoviçi gördük. Təcrübəli məşqçi üzərində seçim etdik. Məncə, daha yaxşı seçimdir. Bu regionda da çalışıb. Bir neçə namizəd üzərində danışıq gedirdi. Sonda hazırkı baş məşqçimizin üzərində dayandıq. Məncə, o, "Neftçi"yə uyğun baş məşqçidir.

"Neftçi"də əvvəllər də tez-tez baş məşqçi dəyişikliyi olurdu. Hazırkı heyətimizə də uyğun məşqçi elə Bojoviçdir. Analizlər etdik, statistikaları incələdik. Sonda hazırkı baş məşqçimizin üzərində dayandıq. Məncə, hazırkı an üçün ən düzgün seçimi etmişik".