"İlk hissədə komandamız 3-cü zonada pressinq edirdi. Fikrimiz var idi ki, rəqibə oynamağa imkan verməyək. Bu hardasa ilk yarıda bəhrəsini verdi. Amma 2-ci yarıda istədiklərimiz alınmadı. "Neftçi"nin əvəzetmələrindən sonra böyülkhesablı məğlubiyyət aldıq".

Prosport.Az xəbər verir ki, bu sözləri "Qaradağ-Lökbatan"ın baş məşqçisi Azər Həşimov deyib.

O, jurnalistlərin suallarını cavablandırıb:

– I Liqada lidersiniz. "Neftçi" Premyer Liqada 6-cı pillədədir. Səviyyə fərqi çoxdur?
– Bir o qədər də uçurum yoxdur. Əvvəl limit var idi, onda uçurum çox hiss edilirdi. İndi sərbəstdir, yaş limiti yoxdur. Bu dəqiqə Premyer Liqa klublarının büdcələri ilə I Liqa büdcələri eyni deyil. 10 dəfə artıqdır. Burada keyfiyyətli oyunçular daha çoxdur. I Liqada isə daha istedadlı oyunçuları üzə çıxarmalıyıq ki, Azərbaycan futboluna xeyir versin.

– "Qaradağ Lökbatan"ın hədəfi hansıdır?
– Premyer Liqaya vəsiqə qazanmaq. Bir neçə iddialı komandalar var. Çalışacağıq ki, Premyer Liqaya vəsiqə qazanaq.

– MOİK "Qarabağ"dan 90+4-cü dəqiqədə qol buraxdı...
– Sözün açığı, futbolçuları inandırdım ki, ən yaxşısını etməyə çalışacağıq. Amma reallığı danışaq. Elə epizodlarımız var idi ki, orada bir toxunuş edib, daha təhlükəli vəziyyət yaratmaq olardı. Təcrübə öz sözünü dedi. "İmişli" də "Qəbələ"yə uduzdu. Biz süni meydançada məşq edib, təbii otda oynayanda çox çətin olur. Ayaqlar tutulur. İlk yarıda "Neftçi"dən də yaxşı oynadıq.