“Azarkeşlər üçün çox maraqlı oyun oldu”.

Prosport.Az xəbər verir ki, bunu "Xəzri" basketbol klubunun baş məşqçisi Murat Dikmen deyib.

Debütantın türkiyəli çalışdırıcısı Azərbaycan Basketbol Liqasının IX turunda “Sabah”a 80:84 hesablı məğlubiyyəti şərh edib. O bildirib ki, bəzi qərarlar komandanın enerji və motivasiyasını aşağı salıb: “Məğlubiyyətimizə bəhanə axtarmaq fikrim yoxdur. Heç vaxt da bəhanə axtarmamışıq. Çünki biz özümüz 13 faul atışını qaçırdıq və 4 xalla oyunu uduzduq. Ona görə də, məhz bura konsentrasiya olmalıyıq. Ən böyük xətamız buradadır. Ribaundlar, atışlar və s. ümumən hər şeydə yaxşı idik. Sadəcə, faul atışları nəticədə özünü göstərdi. Məğlubiyyətimizin əsas səbəbi də budur. Bununla bağlı oyunçularımla danışacağam”.

Murat Dikmen II periodda texniki faul aldığı epizoda da aydınlıq gətirib: “Basketbol qaydalarına görə, müdafiə olunan komandanın oyunçusu əli ilə şitə toxunursa, bu, xal deməkdir. Mənim reaksiya verdiyim bu idi. Ən azından hakimlər təkrara baxaraq qərar verməli idi. Həmin vəziyyətə etiraz etdim. Oyunçuların da, mənim də fikrim həmin epizodda qaldı. Bu da fərqin 13-14 xala çıxmasına səbəb oldu. Amma tez bir zamanda toparlandıq və fasiləyə 3 xallıq fərqlə girdik. III və IV periodda aqressivlik göstərdik. Hətta hesabda irəli də keçə bilərdik. Amma dəyərləndirə bilmədik. Mənim olduğum yerdə hər zaman iddia var. Biz 1-2 komanda ilə bərabər çempionluğun ən böyük namizədlərindən biriyik. Hesabda olmasa da, basketbolumuzla bunu göstərdik. Yəqin ki, ilk dövrəni 3-cü kimi başa vuracağıq. Bu oyundan dərs çıxarıb, II dövrədə daha yaxşı basketbol oynayıb, pley-offa girməyə çalışacağıq. Mövsüm sonunda kubok və ya liqadakı çempionluğu qazanaraq “Xəzri”ni avrokuboklara aparacağıq”.

Qeyd edək ki, qələbədən sonra “Sabah” 17 xalla 1-ci, “Xəzri” 16 xalla 2-ci pillədə qərarlaşıb.