İngiltərənin “Nottingem Forest” klubu “Tottenhem”in keçmiş çalışdırıcısı Nuno Espirito Santonun komandanın baş məşqçisi təyin olunduğunu açıqlayıb.

Prosport.Az xəbər verir ki, 49 yaşlı mütəxəssislə 2 il yarımlıq müqavilə imzalanıb. O, dekabrın 23-də baş tutacaq Premyer Liqanın 18-ci turunun “Bornmut”la oyununda komandanın baş məşqçisi kimi debüt edəcək.

Santonun son iş yeri noyabr ayında tərk etdiyi Səudiyyə Ərəbistanının “Əl-İttihad” klubu olub. O, əvvəllər “Tottenhem”, “Vulverhempton”, “Portu”, “Valensiya” və “Rio Ave” komandalarını çalışdırıb.

Dekabrın 19-da İngiltərə klubu 2021-ci ilin sentyabrından komandaya rəhbərlik edən Stiv Kuperin ayrıldığını elan edib.

“Nottingem Forest” 17 turdan sonra Premyer Liqanın turnir cədvəlində 14 xalla 17-ci yerdədir.