"Qarabağ"ın UEFA Avropa Liqasının pley-off mərhələsində rəqibi "Braqa" oldu. 

Prosport.Az Portuqaliya təmsilçisini tanıdır.

Tarixi
1921-ci ilin 19 yanvarında yaranan klubun ləqəblərindən biri "Os Arsenalistas"dır. Klubun rəngləri bu səbəbdən İngiltərənin "Arsenal" klubununku ilə eynidir. Lakin 1946/47 mövsümünədək əsas komandanın geyim formasının rəngi yaşıl və ağ olub. Bir versiyaya görə, klubun prezidenti Juze Antunes Qimaraynşın Londonda biznes əlaqələri olub və "Arsenal" fanatı olduğundan, belə qərar verilib. Digər versiyaya görə isə, komandanın macar baş məşqçsi Yojef Sabo klub prezidentindən yaşıl-ağ formanı "Arsenal" üslubunda qırmızı-ağa dəyişməyi xahiş edib. Hətta "Braqa"nın gənclərdən ibarət komandası "Arsenal de Braqa" adlandırılıb.

"Braqa"nın emblemində Müqəddəs Məryəm və qucağında İsa peyğəmbər, həmçinin böyük qızılı Braqa tacı əks olunub. Bir çox azarkeşlər Müqəddəs Məryəmin onlara uğur gətirdiyini bildirir.

Uğurları
1963/64 mövsümündə elitaya qoşulan komanda 3 dəfə Portuqaliya Kubokunun (1965/66, 2015/16, 2020/21) və 2 dəfə Liqa Kubokunun (2012/13, 2019/20) qalibi olub. 2008-ci ildə UEFA İntertoto Kubokunun qalibi olaraq UEFA Kubokuna vəsiqə qazanıb. "Braqa" İntertoto Kubokunun qalibi olmuş yeganə Portuqaliya klubudur.

Heyəti
Komandaya məşqçilik karyerası əsasən "Braqa" ilə bağlı olan 51 yaşlı Artur Jorje başçılıq edir. Kapitan Portuqaliya millisinin də üzvü olan Rikardu Ortadır. Braziliya, İspaniya, Mali, Türkiyə, Liviya, Qabon, Uruqvay, İsveç, Konqo Demokratik Respublikası, Kolumbiya, Seneqal və Çexiyadan legionerlər çıxış edir. Hazırda Portuqaliya çempionatında 29 xalla 4-cü olan "Braqa"nın ən məhsuldar oyunçusu Simon Banzadır. 27 yaşlı Konqo əsilli fransalı hücumçu cari mövsüm 14 oyuna 13 qol vurub. Digər hücumçu Rikardu Orta isə 7 qolla 2-ci məhsuldar futbolçudur.

Stadionu
2003-cü ilədək komanda ev oyunlarını "1 may" stadionunda (Estádio 1º de Maio) oynayb. Hazırda bu stadiondan əvəzedici komanda yararlanır. Komanda 2003-cü ildən AVRO-2004 üçün tikilmiş Braqa Bələdiyyə stadionundan (Estádio Municipal de Braga) istifadə edir. Braqa bələdiyyəsinə məxsus, 30 286 tamaşaçı tutumuna malik stadionun inşası 108.1 milyon avroya başa gəlib. Bu arena cənub tərəfində (qapı arxası) təpənin olması ilə seçilib. 2012-ci ilin noyabrın 9-da dünya çempionatının seçmə mərhələsi çərçivəsində Berti Foqtsun baş məşqçisi olduğu yığmamız Portuqaliyaya məhz bu stadionda uduzub – 0:3. AVRO-2004-ün qrup mərhələsinin Bolqarıstan – Danimarka (0:2) və Niderland – Latviya (3:0) matçları məhz bu arenada baş tutub.