"Komandamız yaxşı mübarizə apardı. Azarkeşlərin görmək istədiyi futbolu oynamaq istəyirik. Rəqib bu gün öz ustalığını göstərdi. Gələcəyə baxacağıq. Artıq bizim üçün kubok bitib. Bundan sonra çempionatı düşünəcəyik".

Prosport.Az xəbər verir ki, bu sözləri "Kəpəz"in baş məşqçisi Adil Şükürov ölkə kubokunun 1/8 final mərhələsinin "Sabah"la(3:4) oyunundan sonra keçirilmiş mətbuat konfransında deyib. O, jurnalistlərin suallarını da cavablandırıb:

– Əlavə vaxta hazırlaşmışdınız?
– Hazır idik, futbolçularla bu haqda danışmışdıq. Əlavə vaxtda 2 əvəzetmə etməyi planlaşdırırdıq.

– Hakimlik haqda fikirləriniz necədir?
– Məncə, normal hakimlik oldu. Oyunda bəzən hakimlərlə emosional danışırıq. Hakimlərin böyük səhvi yox idi.

– Əsas heyət oyunçularını ehtiyatda saxlamağınızın səbəbi nə idi?
– Bu əvvəlki oyunlarda çox yüklənmələri ilə bağlı idi. Çünki zədələnə bilərdilər. Oyunçuları qorumaq istəyirdik. Heyətdə olan bütün futbolçulara inanırıq. Bizdə əsas heyət və ya ehtiyat söhbəti yoxdur.

– Adama Nyannın oyununu necə dəyərləndirirsiniz?
– Uğurlu çıxış etdi. Zədədən sonra çox istəkli idi. O, istədiklərimizi edir. Cavad Kərimov da yaxşıdır. Sevindirici haldır ki, Cavad Nyan kimi hücumçunun yanında nələrisə öyrənir.