"Çox parlaq oyun gördük. Sona qədər qalibin kim olacağı bəlli deyildi. Əlbəttə ki, belə matçlar azarkeşlərin çox xoşuna gəlir. Amma məşqçilər belə oyunları sevmir. Vacib olan qələbə idi. Çox şadam ki, qalib gəldik".

Prosport.Az xəbər verir ki, bu sözləri "Sabah"ın baş məşqçisi Murad Musayev ölkə kubokunun 1/8 final mərhələsinin Tovuzda "Kəpəz"lə (3:4) oyundan sonra keçirilmiş mətbuat konfransında deyib.

– Futbolçular arasında mübahisə baş verdi. Həmin zaman sizə də sarı vərəqə göstərildi. Futbolçunuza qarşı haqsızlıq olduğunu düşünürsünüz?
– Sofian Şaklaya niyə sarı vərəqə göstərildiyini anlamadım. O, epizoddan çox uzaq idi. 

– Coy-Lans Mikelsin Səudiyyə Ərəbistanında xoşbəxt olmadığı deyilir. Qayıtmaq istəsə, "Sabah"ın qapıları onun üzünə açıqdır?
– Bilmirəm. Hazırda yalnız "Qəbələ" ilə matç haqda düşünürəm. 

– Aleksey İsayevlə "Qarabağ"ın maraqlandığı deyilir. Siz onun gedişinə hazırsınız?
– Bunlar şayiələrdir. Şayiələrə şərh vermək istəmirəm. Kluba heç bir təklif gəlməyib. Təklif olsa, müzakirə edə bilərik. Mən məşqçi olaraq onun getməyini istəmərəm.

– Emmanuel Ape artıq formaya düşüb?
– Bir oyunla nəsə demək olmaz. Bütün mövsümə görə baxmaq lazımdır. Bugünkü oyunundan məmnunam.