Azərbaycan Basketbol Liqasının VIII turunda "NTD-İndiqo" Xaçmazda "Cəlilabad"a 108:93 hesabı ilə qalib gəlib.

Prosport.Az xəbər verir ki, bu qələbə ilə meydan sahibləri turnir cədvəlində 15 xalla lider olub.

Qarşılaşmadan sonra hər iki komandanın baş məşqçisi oyunla bağlı fikirlərini bildirib.

Tahir Baxşıyev ("NTD-İndiqo"nun baş məşqçisi): "Oyunçular böyük istəklə meydançaya çıxdı. Oyuna çox yaxşı başladıq. Dərhal təşəbbüsü ələ aldıq. Matçın sonunda gənc oyunçulara şans verdik. Öz üzərində işləməlidirlər. Sevindirici haldır ki, azərbaycanlı oyunçular qələbədə böyük pay sahibi oldu və 50%-dən çox xal topladılar. Adətən, əksinə olur. Bu, komanda basketbolu oynadığımızı göstərir. Legionerləri də qeyd etmək lazımdır, xəsislik etmirlər. Bu məni çox sevindirir... Rəşid Abbasov məşqlərdə öz üzərində çox çalışır. Və bu işin nəticələrini görür. Bu gün Əkbər Məmmədov, Murad Babayev də yaxşı oynadı. Əgər Rəşid və Murad ötən mövsüm əsasən ehtiyatda qalırdılarsa, bu gün onları rahatlıqla əsas heyətdə buraxa bilirəm. Bu məni sevindirir. Yaxşı basketbol göstərirlər. İnşallah, bu şəkildə davam edəcəklər".

Şəhriyar Əsgərov ("Cəlilabad"ın baş məşqçisi): "Xaçmaza gedəndə hansı komanda ilə oynamalı olduğumuzu yaxşı bilirdik. Rəqib çox güclüdür. Təəssüf ki, bizdə müəyyən çətinliklər hələ də qalmaqdadır. Bizim ən güclü üzvlərimizdən biri Raşon Consonun zədəli olmasını nəzərdə tuturam. Raşonun "Xırdalan"la oyuna hazır olub-olmaması dəqiq bilinmir. Üstəlik Andrey Kondratyevin zədəsi də təsirini göstərir. Camani Pirsin də yüngül zədəsi var idi, ancaq biz onu meydançaya buraxmalı olduq. Oyuna gəldikdə, rəqib matça çox yaxşı başladı. Onların bütün atışları səbətə düşdüyü halda, bizdə əksinə bu mənada uğursuzluq yaşandı. Böyük fasiləyə qədər ribaundlarda da rəqibin üstünlüyü nəzərə çarpdı. Bunun sayəsində hesabda böyük fərq yaranmışdı. Daha sonra biz müdafiədə oyunu dəyişdirdik və bununla da fərqi azalda bildik, lakin bundan artığına gücümüz çatmadı. Azarkeşlərimizin məyusluğunu anlayıram. Komandamızın potensialı var. Mövsüm uzundur, çox istəyirəm ki, azarkeşlərimiz bizə sonuna qədər inansın və dəstək olsunlar".