Azərbaycan Basketbol Liqasının VIII turunun "Gəncə" – "Şəki" matçından (78:66) matçından sonra hər iki komandanın baş məşqçisi fikirlərini bildirib:

Prosport.Az həmin fikirləri təqdim edir:

Bedri Meriç ("Gəncə"nin baş məşqçisi): "Rəqibimiz çempionatda qələbəsi olmadığı üçün aqressiv oynadı. Qalib gəlmək üçün onlar da mübarizə apardı. Biz əsasən 3-cü və 4-cü periodda üstün oynayıb hesab arasında fərq yaratdıq. Müdafiədə rəqibi saxlamağı bacardıq. Fərq daha böyük ola bilərdi, amma sonlara doğru gənclərə şans verdik ki, onlar da oynaya bilsin. Ardıcıl 2 oyun qalib gəldik, qaldı ilin sonuncu matçı. Hədəfimiz pley-offa düşməkdir. Ona görə bizi qarşıda çətin oyunlar gözləyir. Tribunada bizə dəstək verən azarkeslərə də minnətdarıq. Qələbədə pay sahibi oldular".

Aleksander Uco ("Şəki"nin baş məşqçisi): "Matçda vacib anlarda xal almaq üçün mübarizə apardıq. Biz oyunu tam olaraq keçirə bilmirik. Ən böyük problemimiz 40 dəqiqə ərzində intizamlı oynamamaqdır. Yeni transferlərimiz yeni komandaya uyğunlaşmaq üçün əllərindən gələni edir. Yeni ildən sonra yeni köməkçi məşqçinin olması barədə rəhbərliklə müzakirə aparmamışıq. Ancaq tezliklə klub üçün ən yaxşı variantları müəyyən etmək üçün görüşümüz olacaq".