"Hekken" UEFA Avropa Liqası qrup mərhələsinin sonuncu turunda Bakıda "Qarabağ"a 1:2 hesabı ilə məğlub olub.

Prosport.Az xəbər verir ki. İsveç təmsilçisinin baş məşqçisi Per Matias Höqmo matçdan sonra keçirilən mətbuat konfransında jurnalistlərin suallarını cavablandırıb:

– "Qarabağ"ı təbrik edirəm. Onlara qarşı oynamaq təcrübə idi. Avropa Liqasında yollarına davam edəcəklər. Onları izləməyə çalışacağam. Bu oyun bizim üçün çətin keçdi. İlk dəqiqədəki qol planlarımızı pozdu. Amma şanslarımız var idi. Sadəcə, istifadə edə bilmədik. Bizdə mövsüm bitib. Növbəti mövsümdə Avropa Konfrans Liqasında oynayacağıq. Qrupdakı 6 oyun bizim üçün təcrübə oldu. Bu təcrübədən gələn il Konfrans Liqasında istifadə edəcəyik.

– "Hekken"in baş məşqçisi kimi sonuncu oyununuz idi. Bakıdan hansı təəssüratla ayrılırsınız?
– 2,5 il idi ki, "Hekken"də baş məşqçi idim. İsveç çempionu olduq, oyunçular satdıq, komanda gəlir əldə etdi. "Hekken" indi daha güclüdür. Komandadan yaxşı əhval-ruhiyyə ilə ayrılıram.

– "Qarabağ"ın baş məşqçisinin oğlu Musa Qurbanlının "Yurqorden"də oynadığını bilirsiniz? Onun haqda nə düşünürsünüz?
– Əvvəlki klubumda oynayır. Onun oyununu izləmək həyəcanlıdır. Yanvardan başlasa, daha yaxşı təəssürat bağışlayacaq.

– Hər iki matçda "Qarabağ"a uduzdunuz. Fərqli oyun üslubunda oynasaydınız, "Qarabağ"ı məğlub edə bilərdiniz, yoxsa istənilən halda, səviyyə fərqi imkan verməyəcəkdi?
– İlk matçda demək olar ki, bərabər səviyyəli oyun getmişdi. Hətta penaltimiz verilməmişdi. Verilsəydi, bəlkə də başqa cür olardı. Bu gün də yaxşı oynadıq. "Qarabağ"ın beynəlxalq səviyyəli oyunçuları var. Bizdə belə futbolçular yoxdur. Bu da öz təsirini göstərir.

– Sizcə, "Qarabağ" bundan sonrakı oyunlarda necə təəssürat bağışlaya bilər?
– "Qarabağ"ın fərdi olaraq yaxşı oyunçuları var. Xüsusən də hücumda və mərkəzdə. "Qarabağ" daha güclü rəqiblərlə oyunlarda da qol vurub, fərq yarada bilər. Onlar üçün həyəcanlı püşkatma olacaq. Gözləyək, görək rəqib kim olacaq. "Qarabağ"ın qruplarda çox böyük təcrübəsi var. Bunu da öz oyununda göstərir.