“Çempion olmaq istəyiriksə, bütün məqamlarda diqqətli olmalıyıq”.

Prosport.Az xəbər verir ki, bunu “Xəzri” basketbol klubunun baş məşqçisi Murat Dikmən deyib.

Türkiyəli mütəxəssis “Sərhədçi”ni 117:100 hesabı ilə məğlub etdikləri Azərbaycan Basketbol Liqasının VIII turunun oyunu barədə klubun mətbuat xidmətinə fikirlərini bildirib.

O, ilk hissədə oyuna yaxşı qoşulmadıqlarını etiraf edib: “Ən böyük özəlliyimiz matçlara yaxşı başlamaqdır. Amma son 2-3 görüşdür ki, ilk dəqiqələrdən motivasiyamız əskik olur. Səbəbini özüm də tapa bilməmişəm. 3-cü və 4-cü periodda fərqli oynadıq. Rəqiblərə hörmətlə yanaşıram. Amma 40 dəqiqə zona müdafiəsi oynayan komandaya qarşı çıxış etmək basketbolun gözəlliyi deyil. Ötən oyunda da belə olmuşdu, bu dəfə də eyni formada alındı. Doğrudur, basketbolda hansısa taktika düşünülməlidir. Amma zona müdafiəsini uzun müddət tətbiq etmək olmaz. Belədə basketbol azarkeş üçün zövqverici olmur. Hər halda, bunların hamısı basketbolun bir parçasıdır, hər şeyə hazır olmalıyıq. Nəticədə ardıcıl 4-cü, liqada isə 7-ci qələbəni qazandıq. “Sabah”la qarşıdakı matça daha yaxşı hazırlaşacağıq”.

Baş məşqçi oyunçularından razı qalmadığını söyləyib: "Bu oyuna qədər çempionatda rəqibə ən az atış şansı verən komanda idik. Amma “Sərhədçi” ilə matçda rəqibin çox xal qazanması bizə yaraşmadı. Oyunçularımı məhz bu məqamla bağlı ayrıca tənqid edirəm”.

Murat Dikmən yeni transferləri də dəyərləndirib: “Onlar bazar ertəsi 1 saatlıq məşqə çıxdı. Dünən isə taktiki məşqlərə qatıldılar. Bu mənada hələ ki komandanın ümumi fəlsəfəsini çox bilmirlər. Amma Obri çox yaxşı müdafiəçidir. Qısa müddətdə 3 dəfə top “oğurladı”. Makol isə qüvvətsiz kimi görünsə də, atletikdir. Ondan da çox faydalanacağıq. Onların zamana ehtiyacı var. Bundan sonra liqanı ilk “4-lük”də bitirib, daha sonra pley-offa çıxaraq finalda oynamaq və çempion olmaq istəyirik. İlk gündən bunu deyirəm. Ümidvaram ki, bunu bacaracağıq”.

Qeyd edək ki, “Xəzri” 8 turdan sonra 15 xalla Azərbaycan Basketbol Liqasına başçılıq edir.