“Cəlilabad”ın amerikalı basketbolçusu Raşon Conson klubun mətbuat xidmətinə müsahibə verib.

Prosport.Az həmin müsahibəni təqdim edir.

– Azərbaycan Basketbol Liqasına münasibətiniz necədir? Liqanın səviyyəsi barəsində nə deyə bilərsiniz?
– Liqamız çox maraqlıdır. Bizi uzun mövsüm gözləyir. Azarkeşlər də oyunlara xüsusi maraq qatır.

– Oyunlar necə keçir? Komandanın hesabında 3 qələbə, 3 məğlubiyyət var. Növbəti oyunlara hazırlıq necədir?
– Ümumi götürsək, hər şey qaydasındadır. Qeyd etdiyiniz kimi, 3 qələbə və 3 məğlubiyyətlə yolumuza davam edirik. Uduzduğumuz oyunlardan 2-də kiçik səhvlərə görə məğlub olmuşduq. Növbəti oyunlarda qalib gəlmək istəyirik və həmin səhvləri düzəltmək uğrunda çalışırıq.

– Komanda daxilində vəziyyət nə yerdədir? Əhval-ruhiyyəniz yaxşıdırmı?
– Vəziyyət qaydasındadır. Yeni tranferimiz də var. Culian artıq komandaya qoşulub. Onun gəlişi ilə düşünürəm ki, zamanla daha da güclü olacağıq.

– Xal ortalamasına görə liderlərdən birisiniz. Bu barədə nə düşünürsünüz?
– Bu çox çalışmağın nəticəsidir. Düzünü desəm, bu statistikanı görəndə təəccüblənməmişdim. Mən hər gün var gücümlə çalışıram ki, oyunumu daha da yaxşılaşdıra bilim.

– “Sabah”la oyunda ayağınızdan zədə aldınız. Zədəniz nə yerdədir? Növbəti oyuna çıxa biləcəksinizmi?
– Həmin gün həqiqətən də uğursuz alındı, zədələndim. Lakin oyunun ertəsi günü özümü yaxşı hiss etməyə başladım. Ümid edirəm ki, növbəti oyunlada hazır olacağam.

– Son olaraq, Bakı şəhəri haqda nə düşünürsünüz? Xoşunuza gəlirmi? Ölkəmizdə ən sevdiyiniz yemək hansıdır?
– Bakını ilk günlərdən sevməyə başladım. Burada ən sevdiyim yemək şaurmadır. Çox ləzzətli və dadlıdır. Demək olar ki, hər gün yeyirəm.