I Liqada çıxış edən və autsayder olan "Difai" (Ağsu) komandasının son matçlarının danışılmış oyunlara şübhə açdığı üçün nəzarətə götürüldüyünü xəbər vermişdik.
Prosport.Az UEFA-nın danışılmış oyunlarla bağlı Azərbaycan üzrə nümayəndəsi Seymur Səlimlidən müsahibə götürüb.
– Bizdə olan məlumata görə, I Liqada "Difai"nin bəzi oyunları barədə araşdırılma başlanılıb...
– Klub və konkret oyun barədə fikir bildirməyəcəyəm. Çünki sizdə olan xəbərlə əsl həqiqət fərqli ola bilər. Amma ümumi olaraq bəzi oyunlarda müəyyən şübhələr var və bunlar nəzarətə götürülüb.
– "Difai"nin "İrəvan" və "Zaqatala" ilə oyunlarında son dəqiqələrdə top buraxıb uduzması, rəqibin azlıqda olmasına baxmayaraq, bunun olması, komandanın kapitanının avtoqolu, qapıçının kobud səhvləri əsaslı şübhə sayılırmı?
– Yenə deyirəm. Nəinki bunlar, digər hallar da nəzarətdədir. Hər hansısa şübhə və ya nəticəsi öncədən müəyyənləşdirilmiş oyuna dair siqnal varsa, tərəfimizdən nəzarətə götürülür. Deməzdim ki, bu dəqiqə konkret nəticələr var, ancaq bu barədə iş görülür. Harda şübhə varsa, incələnir və ondan sonra digər prosedurlar həyata keçirilir.
– Yəqin ki, II Liqada da bu tip oyunlar var...
– Ümumən, bəli. I və II Liqada da danışılmış oyunlara əsaslı şübhələr var.
– Premyer Liqa və I Liqa peşəkar, II Liqa yarımpeşəkar, Region Liqası həvəskar statusludur. Region Liqasında da bu cür oyunlar nəzarətə götürülür, yoxsa həvəskar statuslu olduğundan, orada buna ehtiyac duyulmur?
– Manipulyasiya deyildikdə, təkcə həmin oyunların kontorda olub-olması ilə ölçülmür. Turnir cədvəlindəki yerə görə də manipulyasiya da etmək mümkündür. Nəinki Region Liqasında, hətta aşağı yaş qruplarından ibarət komandalarda belə hal aşkarlanarsa, nəzarətə götürülür. Ancaq onu da deyim ki, əsasən Region Liqası həvəskar statuslu turnir olduğundan, kontoru yoxdur və deyilən məqamlardan uzaqdır.
– Danışılmış oyunlara əsaslı şübhələrin üzə çıxmasında medianın rolu sizin üçün nə dərəcədə var?
– Medianın dəstəyinə hər zaman ehtiyacımız var. Çünki orada yazılan hər bir məqamı diqqətdə saxlayırıq. Sözsüz ki, hər yerdə olduğu kimi, mediada da doğru olmayan məlumatlar ola bilər. Onu da incələmək bizim işimizdir.
– Oktyabrda "Difai" klubunun rəhbərliyi də daxil olmaqla, bütün üzvlərinə danışılmış oyunlarla bağlı seminar keçmisiniz. Bu kimi klublarda mühazirələr oxumağınızı UEFA müəyyənləşdirir, yoxsa bu şəxsən sizin özünüz tərəfindən təşəbbüs olaraq atılır?
– Yox, burada UEFA-lıq bir şey yoxdur. Komandanın uyğun saatı nəzərə alınaraq bu seminarlar təyin olunur. Maarifləndirmə üçün bu kimi görüşlərin maksimum olmasına çalışırıq. Bu məsələlər klubların PFL ilə müqavilələrində də var, bu barədə xüsusi bəyannamələr də imzalayıblar.
Səbuhi Musa