"Zədəlilərimiz oldu. Bəzi oyunçular yad mövqelərdə oynayırlar. Bu sarıdan çətinliklərimiz var. Növbəti 2 oyunda toparlanıb, əlimizdən gələni edəcəyik".

Prosport.Az xəbər verir ki, bu sözləri "Sumqayıt"ın məşqçisi Mübaric Orucov Premyer Liqanın 16-cı turunun "Qarabağ"la oyunundan sonra deyib.

O, jurnalistlərin suallarını da cavablandırıb:

– Qurban Qurbanov bildirdi ki, "Sumqayıt" öz oyun üslubuna sadiq qaldı, 3:0 olanda da irəli getməkdən əl çəkmədi. Bu cür rəqibə qarşı bir az qapalı oynamaq olmazdı?
– Bizim öz futbolumuz var. İstəyirik ki, göz oxşayan futbol oynayaq, azarkeşlərimiz üçün gözəl futbol olsun. Qapanmaq məğlubiyyətdən qaçmaq deyil. Doğru futbol oynamaq istəyirik. Düzdür, hesab böyük oldu. Amma bu o demək deyil ki, qapansaydıq, hesab kiçik olacaqdı.

– Trezo Mossi orta sahədə çempionatın ən yaxşılarındandır. Amma bu gün müdafiənin mərkəzində oynadı. Bu, böyükhesablı məğlubiyyətə nə dərəcədə təsir etdi?
– Yad mövqedə oynayırdı. Amma tək onun üzərinə də atmaq olmaz. Müdafiədə çaşqınlığın yaranması səbəb ola bilər. Bəlkə də, o mövqedə ilk dəfədir ki, oynayırdı. Bəzi qollarda onun səhvləri var idi. Amma onu qınayası da deyilik. Məcburiyyətdən onu orada oynatdıq. Start heyətini düzəltməyə futbolçumuz yoxdur. Çətin dönəmdəyik. Zədəlilərimiz çoxdur.

– Əvəzedici heyətdən və yaxud da U-19 heyətindən əsas komandaya cəlb edəcəyiniz oyunçu yoxdur?
– Futbolçular var. Bu gün də 2-ci hissədə gənclərə şans verdik. Amma elə mövqe var ki, oranı əvəz edəcək oyunçu əvəzedici heyətdə də yoxdur. Həssas mövqelər var ki, ora üçün Akademiyada da oyunçu yoxdur.

– Komanda psixoloji cəhətdən özünə gələ biləcək?
– Allah qoysa, bu durumdan komandanı çıxaracağıq. Fasiləyə qədər son 2 oyun vacibdir. Komanda toparlanıb, lazım olan nəticəni əldə edəcək.