Sponsorsuzluq ucbatından dağılmaq təhlükəsi ilə üzləşən "Xarı Bülbül" (Şuşa) və "Xarı Bülbül" (Laçın) komandalarının əcnəbi və yerli voleybolçuları ölkə başçısı İlham Əliyevə video ilə müraciət edib.

Prosport.Az xəbər verir ki, Azərbaycan idmanı tarixində ilk dəfə Şuşanı avrokuboklarda təmsil edən və Avropa arenasında mərhələ adlayan "Xarı Bülbül" (Şuşa) və Azərbaycan milli komandası üçün ehtiyat qüvvə yetişdirmək məqsədi ilə qurulan "Xarı Bülbül" (Laçın) komandalarının əcnəbi və yerli oyunçuları, texniki heyət üzvləri komandanın düşdüyü çətin durumdan qurtulmaq üçün ölkə başçısı, Ali Baş Komandan İlham Əliyevə videomüraciət ünvanlayıb.

Azərbaycanı, Bakını, buranın mədəniyyətini, tarixini, insanlarını və onlara olan münasibəti çox sevdiklərini söyləyən heyət üzvləri bizim üçün dəyərli olan simvolların adını daşıyan bu möhtəşəm layihənin daha da yüksəklərə ucalması üçün ölkə rəhbərliyinin dəstəyinə ehtiyacını olduğunu bildirib və gələcəklərini Azərbaycanla bağlamaqdan qürur duyduqlarını söyləyiblər.

Qeyd edək ki, videomüraciətdə baş məşqçilər – Ziya Rəcəbov, Cavid Süleymanov, oyunçular – Pavel Moroz, Zak Hatçeson, Andrea Santancelo, Keysuke Matsuo, Aleksandar Okoliç, Dyeqo Vilyafane, İlqar İmamquliyev, Nihad Qasımov, Solmaz Rəcəbova, Ceyk Qomes, Salar Qənideqəhrəmanlı, Mərdan Məmmədov, Andrey Melnikov, Şeyla Qafarova, Əli Rüstəmov, Sədaqət Həsənzadə, Banuçiçək Əsgərova və Lamiyə Məmmədova iştirak edib.