Dekabrın 11-də Bakıda baş tutmalı olan qazax güləşi üzrə Avropa çempionatının keçirilməsi sual altındadır.

Bu barədə Prosport.Az-a Azərbaycan Milli İdman Növləri Assosiasiyasının prezidenti Kazım Qurbanov deyib. Onun sözlərinə görə, yarış başqa tarixə salına bilər. 

Ümumdünya Güləş Birliyinin (UWW) təqviminə əsasən bu yarış dekabrın 11-də "Sərhədçi" İdman Mərkəzində keçirilməlidir.

Onu da bildirək ki, bu yarışın ilk dəfə Bakıda baş tutacağını Qazaxıstan Mədəniyyət və İdman Nazirliyinin Bədən Tərbiyəsi və İdman məsələləri üzrə Komitəsinin sabiq sədri, indiki Qazax Güləşi Assosiasiyasının prezidenti Yerbol Mirzəbosınov iyulun 12-də açıqlayıb. Lakin o da yarışın ya oktyabr, ya da noyabrda baş tutacağını bildirib. Göründüyü kimi, artıq yarışın başlamasına 4 gün qalıb və hələ də yarışın keçirilməsi sual altındadır. 

Qeyd edək ki, 2-3 oktyabrda Bakıda UWW təqviminə daxil olmayan kəmər güləşi üzrə Avropa çempionatı baş tutmuşdu. Azərbaycan millisinin üzvləri Bakıda cəmi 1 qızıl, 6 gümüş və 23 bürünc medal qazanmışdı.