"Çempionat başlayandan çox gözəl oyun sərgilədik və yaxşı da irəlilədik. Komanda olaraq çempionatda istənilən kollektiv ilə oynamağa qadirik. Bizim üçün artıq 7 tur arxada qalıb. Onlardan 5-də qələbə qazanmışıq, 2 oyunda isə məğlub olmuşuq. Əslində, həmin qarşılaşmalarda da qalib tərəf biz ola bilərdik. Sadəcə, müəyyən səbəblər ucbatından həmin məğlubiyyətləri yaşadıq".

Prosport.Az-ın xəbərinə görə, bunu "Neftçi"nin amerikalı basketbolçusu Taroce Breyk "NTD İndiqo" ilə oyundan sonra klubun mətbuat xidmətinə açıqlama verərkən deyib.

26 yaşlı oyunçu Azərbaycan Basketbol Liqasının VII turunda "NTD-İndiqo"ya 71:93 hesabı ilə uduzmalarından danışıb: "NTD-İndiqo" ilə qarşılaşmaya aşağı sürətlə başladıq. Komandada bir yorğunluq hiss olunurdu. Biz isə daha çox aqressiv oynamalı idik. Bunu bacarmadıq, daha doğrusu, alınmadı. Əsas oyunçularımızdan 2-si zədəlidir. Maykl Karter meydanda yox idi. Kamran Məmmədov isə zədəli ola-ola, çətinliklə mübarizə aparırdı. İnanıram ki, onlar da tezliklə sağlamlıqlarını tam bərpa edəcək və biz komanda olaraq yenidən qələbələrimizi sıralayacağıq”.