Azərbaycan Basketbol Liqasında VII tura liderlər qrupunda qərarlaşan komandaların oyunu ilə start verilib.

Prosport.Az-ın xəbərinə görə, yenidən "Sərhədçi" İdman Mərkəzində keçirilən turda "Neftçi" "NTD-İndiqo"ya 71:93 hesabı ilə uduzub.

Oyundan sonra komandaların baş məşqçiləri fikirlərini bildirib:

Tahir Baxşıyev ("NTD-İndiqo" komandasının baş məşqçisi): "Zədəli oyunçularımız var idi. Hər biri də bizim üçün çox önəmlidir. Ancaq komandanın xarakter göstərə bilməsi çox xoşuma gəldi. Kimsə zədəlidirsə, bu o demək deyil ki, oyunçular ruhdan düşməlidir. Əksinə, uşaqlar komanda ruhunu göstərdi. Mübarizə aparmaq üçün oyuna çıxdıq. Komandanı qələbə münasibətilə təbrik edirəm. Hamı çox yaxşı oynadı. Düşünürəm ki, ən yaxşı oyunlarımız qabaqdadır. Bu oyunda isə basketbolçularımın döyüş ruhunu bəyəndim".

Anar Sarıyev ("Neftçi"nin baş məşqçisi): "Oyunumuz əvvəldən yaxşı  alınmadı. Heç bir  şey istədiyimiz kimi getmədi. Əsas oyunçularımızdan biri olan Kamran Məmmədov zədəli olduğu halda oyuna çıxdı. Təbii ki, bu da məğlubiyyətimizin əsas səbəblərindən biri oldu. Ümumiyyətlə, səhvlərimiz çox idi, bunlardan nəticə çıxarmalıyıq. "NTD-İndiqo" komandasını, Tahir müəllimi qazandıqları layiqli qələbə münasibətilə  təbrik edirəm! Biz isə toparlanıb növbəti oyunumuza hazırlaşacağıq".