"NTD-İndiqo"nun gənc basketbolçusu Murad Babayev klubun mətbuat xidmətinə müsahibə verib.

Prosport.Az onun fikirlərini təqdim edir.

– V turda "Xırdalan" üzərində qələbə qazandınız. Komandanın qələbəsini necə şərh edərdiniz?
– Məğlubiyyətsizlik seriyası bizdə əminlik və yüksək əhval-ruhiyyə yaratmışdı. Məşqçilərimiz çalışırdı ki, qələbə seriyası bizdə arxayınlıq yox, məsuliyyət hissi yaratsın. Oyunun ilk dəqiqələrindən nəzarəti öz əlimizə götürdük və bunu sonadək də davam etdirdik.

– Bu oyunda meydançada 30 dəqiqədən çox oldunuz. İlk dəfə bu qədər vaxt qazandınız. Bu şansı gözləyirdiniz?
– Oyuna ilk dəqiqələrdən qoşulmaq məndə həyəcan yaratmışdı. Superliqada ilk dəfə belə təcrübə yaşayırdım. Keçən mövsüm NTD-də oynayanda adətən oyunun taleyi həll olduqdan sonra meydançaya daxil olurdum. Bu mövsüm məşqçilərin məndən gözləntiləri çoxdur. Etimadlarını doğrultmağa çalışacağam. 

– Növbəti rəqib "Sabah"dır – çempionatın favoriti. Bu oyundan gözləntilər nədir?
– Rəqibimizi analiz etmişik. Məşq prosesi davam edir. Düşünürəm ki, çox ağır oyun keçəcək. Meydançaya qələbə seriyamızı davam etdirmək üçün çıxacayıq. Biz hazırıq!