"Xəzri" basketbol komandasının baş məşqçisi Murat Dikmən və oyunçusu Endryu Platek Azərbaycan çempionatının V turunun səfərdə "Şəki" ilə oyunundan (62:53) sonra fikirlərini bildirib.

Prosport.Az hər iki şəxsin fikirlərini təqdim edir:

Murat Dikmən ("Xəzri"nin türkiyəli baş məşqçisi): "Bu gün, çox təəsüf ki, yaxşı oyun sərgiləmədik. Təxminən 2-3 həftədir ki, istədiyimiz performansı göstərə bilmirik. Mövsümə yaxşı başlamışdıq, ancaq son həftələr performansımızda eniş müşahidə olunur. Komandamın 62 xal yığması qəbuledilməzdir. Ancaq rəqibi də 53 xalda saxlamaq bizim üçün çox vacib idi. Çempionatın ən məhsuldar basketbolçusu Pol Dibal mövsümdə ortalama 30 xalla çıxış edir, lakin biz onu 15 xalda saxlamağı bacardıq. Müdafiədə istədiyimiz kimi çıxış etsək də, amma hücumda uğurlu olmadığımız üçün görüş bizim üçün bir az çətin keçdi. Yekunda yaxşı oynamadığımız bir gündə qalib gəlmək bizim üçün çox dəyərlidir. Bundan sonra yaxşı oyun sərgiləyərək qələbə qazanmaq istəyirik. Turnir cədvəlinə baxdıqda 5 oyuna 4 qalibiyyətimiz var və bu da çox vacib bir haldır. Səhvlərimizdən dərs çıxarıb gələn həftəki “Xırdalan” matçına hazırlıqlarımıza başlayacağıq".

Endryu Platek ("Xəzri"nin amerikalı basketbolçusu): "Xoşbəxtəm ki, bu görüşdə qələbə qazandıq. Buna baxmayaraq, oyunumuzu göstərə və potensialımızı tam olaraq sərgiləyə bilmədik. İlk hissədə yaxşı çıxış etməsək də, böyük fasilədən sonra toparlana bildik. Atışlarımız istədiyimiz qədər uğurlu deyildi. Ona görə də komanda olaraq bunun üçün daha da çox çalışmalıyıq. Şəxsi performansıma gəlincə isə, matçın ən məhsuldar basketbolçusu olduğum üçün çox şadam. Komanda yoldaşlarım məni çox yaxşı nöqtələrdə topla təmin etdilər və mən də bu fürsətləri boşa vermədim. Bundan sonrakı qarşılaşmalarda da əlimdən gələni etməyə çalışacağam. Komandamın qələbəsində böyük pay sahibi olduğum üçün çox xoşbəxtəm".