Sumqayıt Olimpiya İdman Kompleksində Azərbaycan Basketbol Liqasının V turunun növbəti oyunu baş tutub.

Prosport.Az xəbər verir ki, “Xırdalan” və “NTD-İndiqo” komandalarının qarşılaşdığı oyunda Xaçmaz təmsilçisi 96:86 hesablı qələbə qazanaraq məğlubiyyətsizlik seriyasını davam etdirib.

Uğur Özdəmir ("Xırdalan"ın baş məşqçisi): "Rəqibi təbrik edirəm. Gözəl oyun sərgilədilər. Biz bu dəfə də oyuna çox sadə səhvlərlə başladıq. Öz ritmimizi bərpa etdik, oyuna ortaq olduq, amma artıq çox gec idi. Bu da komandamızın gənc olmasından irəli gəlir. Bu gün ribaundlarda və müdafiədə səhvlərimiz oldu. Çox güclü 2 oyun qurucusunun qarşıdurmasını izləyəcəkdik. Amma rəqibin oyun qurucusu daha güclü oyun sərgilədi. O xüsusilə yerli oyunçular üzərində bu üstünlüyü yaxaladı. Ehtiyat oyunçulardan bu dəfə də çox xal ala bilmədik. Bu yaxşı hal deyil. Yeni 2 oyunçu heyətə qoşulacaq. Onlardan 1-i dəqiqdir. Mərkəz oyunçusu mövqeyinə olacaq. Amma bununla iş bitmir. 3+2 limitində oynadığımız üçün yerli oyunçu baxımından axsayırıq".

Tahir Baxşıyev ("NTD-İndiqo”nun baş məşqçisi): "Ağır oyun oldu. Elşad Şirzadov zədə səbəbindən matçı buraxırdı. Əkbər Məmmədov isə 5 qayda pozuntusuna görə 2-ci hissənin sonunda meydancanı tərk etməli oldu. Onlar bizim üçün çox vacibdir. Ancaq gənc oyunçular üçün bu oyun əla bir təcrübə oldu. Özlərini yaxşı tərəfdən göstərə bildilər. Murad Babayev çox xoşuma gəldi. Bu oyun gənc oyunçularımız üçün bir şans oldu. Bu cür oyunlarda təcrübə və inam qazanırlar. Onlar adətən meydançada bu qədər vaxt keçirmirlər. Ümumiyyətlə, oyundan razı qaldım. Baxmayaraq ki, heyətlə bağlı problemlərimiz var idi. Uşaqlar xarakter göstərdilər və əhəmiyyətli bir qələbə qazandılar. Əvvəlki oyunla müqayisədə daha az top itkisi yaşadıq. Oyunun keyfiyyəti də yaxşı idi. Elşada gəlincə, onun yüngül zədəsi var, lakin növbəti oyunda bizə kömək edəcək".