Dünya Alpaqut Federasiyasının (DAF) Beynəlxalq İdman Hamı üçün Assosiasiyasına (TAFISA) üzv olması ilə bağlı mətbuat konfransı keçirilib.
Prosport.Az xəbər verir ki, tədbirdə DAF prezidenti Jalə Əhmədova, vitse-prezident Fərid Əlizadə, Gənclər və İdman Nazirliyinin sektor müdiri Aydın Məmmədov, Azərbaycan Milli İdman Növləri Assosiasiyasının prezidenti Kazım Qurbanov, DAF Azərbaycan nümayəndəliyinin rəhbəri Qüdrət Nuriyev və TAFISA-nın Avropa həmsədri Patrik Peroza və TAFISA İdarə Heyətinin üzvü Marko Tomazini iştirak edib.
Millət vəkili Jalə Əhmədova çıxışında Azərbaycanın TAFISA-da təmsil olmağının böyük qürur hissi olduğunu vurğulayıb. O, yaxın zamanda federasiyanın daha yüksək nailiyyətlərə imza atacağını qeyd edib.
Daha sonra çıxış edən GİN sektor müdiri Aydın Məmmədov alpaqut turan döyüş növünün ölkəmizdə olduğu kimi, dünyada da böyük nüfuz qazandığını və bu işin ölkəmizin dünyada nüfuzunun artması üçün vacib hadisə olduğunu bildirib.
TAFISA-nın son XXVIII dünya konfransında Azərbaycana böyük marağın olduğunu bildirən F.Əlizadə deyib: "Görüş zamanı Azərbaycan və xüsusi olaraq alpaqut idman növü tanıdıldı. Tədbir bitdikdən sonra TAFISA-nın əməkdaşları ilə 3 görüş keçirildi. Bunlardan biri qeyri-rəsmi görüş idi. Növbəti günlərdə TAFISA-nın gələcək layihələri ilə bağlı tədbirlər davam etdi. Qurum tərəfindən bizə daimi üzvlük və səsvermə hüququ təqdim olundu. Bu uğur Prezident İlham Əliyevin idmana göstərdiyi diqqət və qayğının nəticəsidir”. Federasiya rəsmisi TAFISA-nın növbəti konfransının 2027-ci ildə Botsvanada keçiriləcəyini vurğulayıb.
Daha sonra TAFISA-nın Avropa həmsədri Patrik Peroza çıxış edib. 162 ölkənin qurumda təmsil olunduğunu söyləyən nümayəndə əlavə edib: "Böyük məmnunluq hissi duyuruq ki, Azərbaycan da bizim aramıza qoşulub. TAFISA BMT, UNESCO və Beynəlxalq Olimpiya Komitəsi tərəfindən tanınır. Təşkilatın adından da bəlli olduğu kimi, hər birimizi dostluğa və sülhə dəvət edir".
Sonra alpaqut döyüş sənətinin qurucusu Vasif Namazov bu idman növünün gələcəyə dair böyük və ciddi məqsədlərinin olduğunu bildirib.
Sonda mükafatlar təqdim olunub.
Qeyd edək ki, TAFISA 1991-ci ildə yaranıb.
