Millimizin sabiq futbolçusu Əfran İsmayılovun yaratdığı veteranlardan ibarət minifutbol komandasının yekun adı müəyyənləşib.

Bu barədə Prosport.Az-a Azərbaycan Minifutbol Federasiyasının mətbuat xidmətinin rəhbəri Sərxan İbrahimoğlu məlumat verib.

Onun sözlərinə görə, komandanın adı "İnter" olacaq. Dekabrın 1-də 16 komandanın iştirakı ilə baş tutacaq püşkatmaya komanda məhz bu adla qatılacaq.

Qeyd edək ki, futbol üzrə milli komandamızın sabiq oyunçularından qurulmuş bu minifutbol komandasının adı əvvəl "Qarabağ", daha sonra "Xankəndi" olmalı idi. Lakin yuxarı dairələrdə "Xankəndi" adının verilməsinə icazə verilməyib. Belə ki, bu adda ilk komandanın böyük futbolda olacağı labüd bilinib.

Onu da bildirək ki, 2015-ci ildə Əfran İsmayılov yarım mövsüm "İnter" adlanan (indiki "Şamaxı" – red.) klubda çıxış edib.