"Gündəlikdə bir məsələ var idi, o da Canni De Byazinin hesabatının dinlənilməsi və gələcək taleyi ilə bağlı müzakirənin aparılması idi. Məlumat üçün onu bildirim ki, Canni De Byazi iclasda iştirak etdi və qısa olaraq, nəticələr barəsində müəyyən məlumatı verdi. Ondan sonra öz xahişi ilə bildirdi ki, bundan sonra Azərbaycanda fəaliyyətini dayandırmalıdır və müqavilənin müddətinin uzadılmamasını xahiş etdi. Canni De Byazi dinlənildi və AFFA İcraiyyə Komitəsi (İK) üzvləri daxildə müzakirə apardılar. Son 3 ildə onun vaxtında millinin nəticələri də nəzərə alındı. Ümumi məsələlər də müzakirə olundu və İcraiyyə Komitəsinin üzvləri tərəfindən də belə qənaətə gəlindi ki, müqavilənin müddətinin uzadılmaması qəbul olunsun. Bu o deməkdir ki, Canni De Byazi ilə müqavilə uzadılmayacaq".
Prosport.Az xəbər verir ki, bu sözləri İK iclasından sonra AFFA-nın baş katibi Sərxan Hacıyev jurnalistlərə açıqlamasında deyib.
– Canni De Byazi özü bunu etməsə, İK müqavilənin müddətini uzatmağı düşünürdü?
– Bu suala cavab vermək çətindir. Çünki bu bir az başqa istiqamətdə cərəyan edəcək hadisələr idi. Prosedur var və ilk növbədə baş məşqçinin hesabatı dinlənilməlidir. Onun hesabatı dinlənildikdən sonra özü tərəfindən bu cür xahiş olundu. Xahiş olmasaydı, İK hansı qərarı verəcəkdi, mənim üçün demək çətindir.
– Hamı gözləyirdi ki, İK italiyalı ilə bağlı qərar versin, amma görünür ki, De Byazi özü getməsini xahiş edib. İclasın 10 dəqiqəsindən sonra da AFFA-nın binasını tərk etdi...
– Öz fikrini bildirsə də, İK müəyyən müzakirələr apardı. Sonda İK da nəticələri nəzərə alaraq, belə qərara gəldi ki, müqavilə müddətinin uzadılmaması ən düzgünüdür.
– Başqa nələr müzakirələr edildi?
– Xüsusi işçi qrup yaradılacaq. Orada İK tərəfindən də müəyyən üzvlər yer alacaq. Ehtimal var ki, kənardan da müəyyən mütəxəssislər cəlb olunsun və həmin işçi qrup tərəfindən baş məşqçi postuna müəyyən təkliflər verilsin. Əlbəttə ki, detallı şəkildə hər bir amillər nəzərə alınaraq, analiz olunacaq. Ondan sonra təkliflər İK-da yenidən müzakirəyə çıxarılacaq və qərar veriləcək. İşçi qrupunun üzvləri ilə bağlı bu dəqiqə məlumat verə bilmirik. Yaxın zamanlarda məlumat veriləcək.
– Uzun illərdir ki, əcnəbilər millimizi çalışdırır. Yerli məşqçilər üzərində dayanmağın vaxtı çatması barədə iclasda müzakirələr aparıldı?
– İclasda müxtəlif fikirlər səsləndirildi. Bu barədə fikir mübadiləsi də aparılırdı. İK-nın müxtəlif üzvləri tərəfindən müxtəlif fikirlər səsləndirildi. Siz dediyiniz fikrə də uyğun fikirlər səsləndirildi.
– Baş məşqçi məsələsinə nə vaxt aydınlıq gətiriləcək?
– Növbəti oyunumuz martdadır, o da yoldaşlıq oyunudur. Məqsədəuyğun odur ki, həmin yoldaşlıq matçlarından bir neçə ay öncə artıq baş məşqçi məsələsi həllini tapsın. Hələ ki son tarix qoyulmayıb. Lakin düşünürəm ki, yaxın 1-2 ay ərzində məsələ öz həllini tapa bilər.
– Yanvarda İK-nın iclasına qədər qərar artıq hazır olacaq?
– Bu dəqiqə 100 faiz heç nə deyə bilmərəm. Amma ehtimal var ki, belə olsun. Çünki baş məşqçiyə də vaxt verilsin ki, martdakı oyunlara hazırlaşsın.
– Yeni baş məşqçi seçilərkən, hansı meyarlar əsas götürüləcək? Əsas məsələ ad olacaq?
– Xeyr, ad məsələsi əsas meyar kimi götürülməyəcək. Müzakirələr əsasında onu deyə bilərəm ki, vacib kriteriyalardan biri yerli mentaliteti və yerli futbolçuları tanıyan, daha çox yerli mədəniyyətə uyğun namizədin olmasıdır.
– O zaman belə çıxır ki, yerli mütəxəssislərin şansı daha yüksəkdir?
– Bu dəqiqə 100 faiz bunu demək çətindir. Amma millinin yeni baş məşqçisinin yerli olması ehtimalı az deyil.
– De Byazinin mətbuatla bağlı dedikləri iclasda müzakirə edildi? Qınaq kimi ona nəsə deyildi?
– Bəli, bu məsələ də müzakirə olundu və qınanıldı. Belə halların olması İK tərəfindən birmənalı şəkildə pislənildi.
– Canni De Byazi deyir ki, 3 ildə yığma inkişaf etdi. Bəs İK bu haqda nə düşünür?
– De Byazi dinlənildi və müzakirələr aparıldı. İK onunla müqavilə müddətinin uzadılmamasına qərar verəndə, təbii ki, nəticələri də nəzərə alınmışdı.