Haram olsun, boğazımızdan kəsilib sənə verilən pullar!..
Bu sözlər Canni De Byaziyə şamildir. O De Byazi ki, həmkarımız İlkin Fikrətoğlunun Brüsseldə tənqidi sualları qarşısında tab gətirməyib, Cəbəllüttariqin də Fransaya 0:14 hesabı ilə uduzduğunu gözümüzə soxub və bununla da Azərbaycanı cırtdan ərazi ilə, bəli, bəli, heç müstəqil ölkə statusu olmayan ərazi ilə müqayisə edib. Dünənki mətbuat konfransında Sinyor de Byazi özünü bizlərə tamamilə tanıtdı. Deyilənə görə, mətbuat konfransında 0:5 hesablı məğlubiyyətə haqq qazandırmaq üçün "siz vaxtı ilə Fransaya 0:10 hesabı ilə uduzmuş ölkəsiniz" də deyib.
Əhsən, nə deyəsən beləsinə. Onu gətirdilər ki, müasir Albaniya millisinin işıqlı gələcəyini Azərbaycanda – qədim Albaniyanın varisində də təkrarlatsın, o isə neynir? Bizi təhqir edir. Burnundan gəlsin, qazandıqların!
"Futbol+"in baş redaktoru Mahir Rüstəmlinin "Azərbaycanı tərk etsə, bizim jurnalistlər üçün darıxacaqsınızmı?" sualına verdiyi cavaba baxın: “Əlbəttə yox, mən belə axmaq jurnalistlərə rast gəlməmişəm. Heç nə bilmirlər, axmaq suallar verirlər və sadəcə axmaqdırlar. Bizim Bakıda Avstriya, İsveç və Belçika ilə oyunumuzu unudurlar. "Fiat 500" ilə "Ferrari"yə qalib gələ bilməyəcəyinizi görməyə qadir deyillər".
Bizim tərcüməçi bunu bu formada azərbaycanlı jurnalistlərə çatdırmasa da, De Byazi yanındakı qadın əməkdaşa belçikalılara bunu tərcümə etməyi xahiş edib ki, onlar başa düşsün. Daha sonra konfransı erkən tərk edərkən yıxılmağa az qalıb və çıxış qapısını dəyişik salıb. Sonradan AFFA-nın baş katibi Sərxan Hacıyev bu hərəkətə görə üzr istəyib. Ancaq üzr istəməli və dəyişik saldığı qapıdan birdəfəlik yola salınmalı olan şəxs elə De Byazidir.
AFFA-dakılar artıq anlamalıdır ki, adında Can olan hər adamdan bizə can olmaz. İstefa mütləqdir, Qazaxıstan bu gün Avropa çempionatı üçün Azərbaycana pley-off şansı saxlasa da, saxlamasa da. Qoca Foqts Osiyekdə 0:6-dan sonra istefa verməli olmuşdu, gərək mütləqdirmi ki, 0:6 təkrarlansın? Bəxti gətirdi ki, qarşı tərəfdəki həmkarı yerlisi Domeniko Tedesko idi. İtalyan məşqçi Lukakunu çıxarmasaydı, inanın, Xorvatiya, Portuqaliya və ya Polşa faciələri təkrarlanacaqdı.
Bəli, Belçika millisi bizdən güclüdür. Futboldur, 0:5 hesabı qeydə alına bilər. Ancaq qol vurmaq cəhənnəm, tarixinin ən güclü Azərbaycan yığması adlandırılan bu milli rəqib qapısını 1 dəfə də nişan almağı bacarmırsa, onda hansı məşqçi işindən söhbət gedə bilər?! Sonda onu da xatırladım ki, 12 il əvvəl həmin Yan Vertonqen və Romelu Lukakunun çıxış etdiyi Belçika millisinə 1 seçmə mərhələdə 2 qol vurmağı bacaran da Azərbaycan millisi olmuşdu. Bir neçə gün əvvəl "Zenit"lə matçda vida oyununa çıxan Ruslan Abışovdan yenidən geri dönməyimi tələb edək və ya Rauf Əliyevə Belçikaya necə qol vurmağı öyrətməyimi xahiş edək? Həmin Belçika millisinin müdafiəsində Vertonqendən başqa, Daniel Van Buyten, Vensan Kompani, Tobias Alderveyreld, yarımmüdafiəsində Maruan Fellaini, Aksel Vitsel, ön xəttində Eden Azar, Dris Mertens kimi futbolçular oynayırdı. Düşünməyə dəyərmi?
Səbuhi Musa