Azərbaycan Basketbol Liqasının IV turunun "Şəki" – "Cəlilabad" oyunundan (61:97) oyunundan sonra baş məşqçilər klubların mətbuat xidmətlərinə açıqlama verib.

Prosport.Az həmin fikirləri təqdim edir:

Aleksander Uco ("Şəki"nin baş məşqçisi): "Əvvəldən razılaşdığımız üçün nisbətən müdafiədə oynamadıq. Əcnəbi oyunçularımız qarşılaşma zamanı çox erkən faul alırlar. Müdafiə bu gün çox-çox zəif idi. Yenə hücumda intizamlı olmadıq. Bu da bizim ehtiyat oyunçular skamyamızın zəif olması ilə bağlıdır. Top itkisinə daha az yol verdik, amma istərdim ki, bu çox-çox minimum olsun. 3 xallıq atışlarda dəqiq ola bilmirik. Yerli oyunçularımızdan birinin (Kamal İmamverdiyevi nəzərdə tutur) bir neçə dəqiq atışı oldu, ancaq komandanın zəif çıxışı fonunda o da yaxşı görünmədi. Həmçinin 3-cü periodda geridönüş etməyə çalışdıq, ancaq atışlarımız dəqiq olmadı. Mən hələ də inanıram ki, çatışmayan bütün cəhətləri düzəldə biləcəyik".

Şəhriyar Əsgərov (“Cəlilabad”ın baş məşqçisi): "Oyun gözlədiyimizdən daha rahat keçdi. Bunun əsas səbəbi isə müdafiədə etibarlı olmağımız idi. Rəqibin bütün həmlələrinin qarşısını məharətlə ala bildik. Hücum mənasında da istədiyimiz oyunu nümayiş etdirə bildik. Nəticədə də qələbə qazanıldı. Lakin bu qələbə oyunçularımda arxayınlığa səbəb olmamalıdır. İstər hücumda, istərsə də müdafiədə hələ də inkişaf etdirməli olduğumuz cəhətlər var. Məşqlərdə bunun üzərində işləyəcəyik. Azarkeşlərimizi qələbə münasibətilə təbrik edirəm. Bu ayın 25-i Cəlilabadda oyunumuz var. Azarkeşlərimiz önündə həmin oyunda da qalib gəlməyə çalışacağıq".