“Neftçi” Azərbaycan Basketbol Liqasının IV turunda “Sumqayıt”a qalib gəlib – 97:73.

Prosport.Az xəbər verir ki, oyundan sonra "Sumqayıt"ın baş məşqçisi Teymur Hüseynov klubun mətbuat xidmətinə matçla bağlı açıqlama verib:

"Rəqib bizdən güclü idi və bunu etiraf etmək lazımdır. Yeni komandayıq, bir neçə gün ərzində 2 yeni basketbolçunu heyətimizə cəlb etmişik. Bu gün də iranlı oyunçunu sıralarımıza qatacağıq. Öz üzərimizdə işləməliyik və meydanda döyüşməliyik. Sumqayıtda doğma publika qarşısında ilk oyunumuzu keçirdik və bizə əla dəstək verdiklərinə görə azarkeşlərimizə təşəkkür edirik. Əslində oyuna yaxşı başladıq, sadəcə, müdafiədə səhvlər öz sözünü dedi və nəticədə məğlub olduq. Basketbol komanda oyunudur, nə qədər fərdiyyətçi olsaq, bir o qədər əziyyət çəkəcəyik. Bu gün bəzi basketbolçularımız fərdi oyuna üstünlük verdi. Pley-offa vəsiqə qazanmaq üçün sona qədər mübarizə aparacağıq. Hələ mövsümün əvvəlidir".