Azərbaycan Basketbol Liqasında IV tura start verilib.
Prosport.Az xəbər verir ki, turun açılış matçında lider “Xəzri” Sumqayıtda Xaçmaz təmsilçisi “NTD-Indigo”nu qəbul edib. Qarşılaşma Bakı klubunun 71:86 (12:17, 17:30, 26:18, 16:21) hesablı məğlubiyyəti ilə yekunlaşıb.
Qeyd edək ki, keçirdiyi 4 matçda 7 xal toplayan “Xəzri” turnir cədvəlinə başçılıq edir. Hər 3 oyunu qələbə ilə başa vuran “NTD-Indigo” 6 xalla 2-ci pillədə qərarlaşıb.
Tahir Baxşıyev ("NTD-Indigo"nun baş məşqçisi): "Xəzri" çox ciddi rəqibdir. Komandanın heyətində yaxşı legionerlər və Azərbaycan yığmasının təcrübəli oyunçuları, ilk növbədə, Amil Həmzəyev – milli komandanın kapitanı var. Heyətdə gənc və perspektivli Səid İsmayılov var. Bilirdik ki, bizi çətin oyun gözləyir. İlk 2 periodda hər şey plana uyğun keçdi, lakin 3-cü hissədə heç də yaxşı oynamadıq. 4-cü hissədə oyunu yenidən öz əllərimizə ala bildik və nəticədə qələbə qazandıq. Oyuna gəldikdə, məmnun olduğum məqamlar var, amma üzərində işləyəcəyimiz çatışmazlıqlar da var”.
Elşad Şirzadov ("NTD-Indigo"nun basketbolçusu): "Oyun çox gərgin keçdi. Belə oyun gözləyirdik. "Xəzri" çempionatın liderlərindən biridir. 3 matçda üç qələbə qazanmışdılar. Onların heyətində yaxşı yerli oyunçular – Amil Həmzəyev və Səid İsmayılov var. Səid ötən mövsüm bizim komandada idi. Düşünürəm ki, bizim də yaxşı yerli oyunçularımız var. Müdafiədə yaxşı oyun göstərdik. Bu da bizim qələbəmizdə mühüm rol oynadı".
Murat Dikmən ("Xəzri"nin baş məşqçisi): "Mən heç bir zaman bəhanələrə sığınmaq istəmirəm. Qalibiyyətdə də, məğlubiyyətdə də hamımızın payı var. "NTD-Indigo"nu təbrik edirəm. Çox yaxşı mübarizə apardılar. Oyunun əvvəlindən bəri enerjilərini ortaya qoyaraq haqlı bir qələbə qazandılar. Daha əvvəl də qeyd etdiyim kimi, biz yalnız bazar ertəsi məşq etmişdik. Çərşənbə axşamı və çərşənbə günlərində hazırlıqlarımızı davam etdirə bilməmişdik. Bu bir bəhanə deyil. Ancaq daha yaxşı hazırlaşmalı idik. Enerjimizi ortaya qoya bilmədik. Həm müdafiə, həm də hücumda uğurlu təsir bağışlamadıq. Bu da bizim matça yaxşı konsentrasiya ola bilmədiyimizi göstərir. Bu oyundan dərs çıxaracağıq. Ümid edirəm ki, bundan sonrakı qarşılaşmalarda daha yaxşı təsir bağışlayacağıq".
Amil Həmzəyev ("Xəzri"nin basketbolçusu): "Biz bu oyundan əvvəl məşq proseslərimizlə bağlı problemlər yaşamışdıq. Tam olaraq məğlubiyyətin səbəbinin bu olduğunu demək istəmirəm. Ancaq bizə psixoloji olaraq təsir göstərdi. "NTD-Indigo" yaxşı komandadır. Çempionatın favoritlərindəndir. Biz öz oyunumuzu tam ortaya qoya bilmədik. Əslindən bundan da yaxşı çıxış edə bilərdik. Hələ mövsüm uzundur və çalışacağıq ki, növbəti oyunlarda öz yerimizi qoruyaq. Ümumi olaraq “Sabah” və "NTD-Indigo" çətin rəqiblərdir. “Neftçi” də bizim üçün yaxşı rəqibdir. Bu komandalarla görüşlərdə öz performansımızı göstərərək pley-offdakı yerimizi möhkəmləndirməliyik".