İsveç milli komandası AÇ-2024-ün seçmə mərhələsi çərçivəsində səfərdə Azərbaycana 0:3 hesabı ilə məğlub olub.

Prosport.Az xəbər verir ki, qonaqların baş məşqçisi Yane Andeşon matçdan sonra keçirilən mətbuat konfransında jurnalistlərin suallarını cavablandırıb:

– Azərbaycan millisindən bu cür oyun və belə hesab gözləyirdiniz?
– Azərbaycan çox yaxşı komandadır. Heyətində fərdi keyfiyyətləri yaxşı olan oyunçular var. Rəqib oyunun əvvəlində 2 asan qol vurdu. Bundan sonra geridönüş etmək çətin idi. Azərbaycan millisi Belçika və Avstriyaya qarşı da yaxşı oynamışdı. Sadəcə bəxt onların tərəfində deyildi. Bu gün də hər şey Azərbaycanın istədiyi kimi getdi. Onları təbrik edirəm.

– Futbolçu və baş məşqçi kimi zəngin karyeraya maliksiniz. Azərbaycan millisinin vurduğu 3-cü qolu necə şərh edəcəksiniz? Bu cür fantastik qol görmüşdünüz?
– 2017-ci ildə Fransa millisinin qapıçısı Uqo Llorisə 45 metrdən qol vurmuşduq. Çox yaxşı qol idi. Oyunçunun konsentrasiyası, epizodu görməsi... Onu da qol münasibəti ilə təbrik edirəm.

– Avropa çempionatının final mərhələsinə vəsiqə qazanmaq şansınız qalsaydı, bu gün başqa cür olardı?
– Mənim üçün fərq etmir. Bu gün biz məğlub olduq. Azərbaycan millisini təbrik edirəm. Onlar buna layiq idi. Mən isə məyusam.