"Bu oyundan əvvəl komanda bir neçə itki ilə üzləşmişdi. 4 oyunçum zədələnmişdi və hətta onlardan 1-i əməliyyata götürülüb".

Prosport.Az-ın xəbərinə görə, bunu "Şəki" BK-nın baş məşqçisi Aleksander Uco deyib.

Nigeriyalı məşqçi Azərbaycan Basketbol Liqasının III turu çərçivəsində "Neftçi" İK-ya 64:90 hesabı ilə uduzmalarının səbəblərini açıqlayıb: 

"Mövsüm əvvəlində heyət qurmağa az imkanımız oldu və bu da komandanın çıxışına təsir edir. Həm əcnəbi, həm də yerli oyunçu qıtlığından əziyyət çəkirik. Heyətdə ötən mövsüm birgə oynamış cəmi 3 basketbolçu var. Komanda heç vaxt bir yerdə oynamamış basketbolçulardan qurulduğundan, anlaşma məsələsi də öz sözünü deyir.  

I və II periodda yaxşı müdafiə olunduq. “Neftçi” çox intizamlı, böyük istedadlı basketbolçulara malik komandadır. Təsəvvür edə bilirsiniz ki, onların ehtiyat oyunçular skamyasından meydana çıxanlar 28 xal toplayıb, bizimkilər isə cəmi 6 xal qazanıb. Bu sizə çox şey deyə bilər.

Hər halda, növbəti oyunumuzdan əvvəl heyətə bir neçə yeni oyunçu qatacağımıza ümid edirik".