"Oyuna pis başladıq və bu bizə çox təsir etdi. Bəzi səhvlərdə gənc komanda olduğumuz hiss olunurdu.Əsasən müdəfiədə və ribaundlarda çox səhvlərimiz var. Bunların üzərində çalışsaq, daha yaxşı yerə gələcəyimizə inanıram. Rəqibin güclü və avrokubok təcrübəsi olan legionerlərinin oyunu birmənalı şəkildə fərq yaradırdı. Xüsusən müdafiədə çox sərt oynayırdılar ki, bu da ilk dəqiqələrdən hesabda özünü göstərdi".

Prosport.Az-ın məlumatına görə, bunu "Xırdalan" basketbol komandasının üzvü Fikrət Ələkbərov deyib.

Həmçinin, "Xırdalan"ın türkiyəli baş məşqçisi Uğur Özdəmir də Azərbaycan Basketbol Liqasının III turunda "Sabah"a 87:99 hesabı ilə uduzduqları matç haqqında fikirlərini bildirib:

"Oyuna müdafiə olaraq çox pis başladıq. Sərt oynaya bilmədik və rəqib bizi yaxşı cəzalandırdı. Hakimlərə oyunun əvvəlində etdiyim etirazlar oxşar epizoda görə fərqli qərarların olması ilə bağlı idi. Oyunun əvvəlində fərqin böyük olmasının səbəblərindən biri də bu idi.

Fasilədə  komandama  məşq zamanı icra etdiyimiz bir neçə kombinasiya və müdafiə aspektində bəzi məsələləri xatırlatdım. Daha sərt müdafiə oyunu oynamağımız lazım idi ki, bunu reallaşdırdıq. Amma periodun sonunda gənc oyunçularımızın üst-üstə 4 top itkisi ilə üstünlük yenidən rəqibə keçdi.

Ümumiyyətlə fasilədən sonrakı hissəni yaxşı oynadıq. Xüsusilə yaxşı müdafiə olub, hücumda effektiv olmağı bacardıq. Bizim kimi ehtiyatı az olan komanda üçün belə gedişatlı matçlarda toparlanıb oyuna geri dönməyi bacarmaq önəmli məqamlardandır. Sonda oyuna ortaq olduq, amma artıq gec idi.