"Böyük fərqlə qələbə qazanmağımıza baxmayaraq, açığı, 1-ci və 2-ci periodda öz oyunçularımdan razı deyildim. Çünki müdafiədə çox zəif oynadıq".

Prosport.Az-ın xəbərinə görə, bunu Azərbaycan Basketbol Liqasının III turunun “Neftçi” – "Şəki" oyunundan (90:64) sonra “Neftçi”nin baş məşqçisi Anar Sarıyev klubun mətbuat xidmətinə açıqlamasında deyib.

O bildirib ki, hücumdan razı qalıb: "Biz oyundan əvvəl də onu danışmışdıq ki, bizə əsas müdafiə lazımdır, daha az xal itirməliyik. Hücumda bizdə alınır, demək olar ki, top saxlamağı komanda olaraq bacarırıq. Ancaq müdafiədə çox işləməli idik. Fasilədə danışdıq və hamımız bir fikrə gəldik ki, müdafiədə çox pis oynadıq. 3-cü perioda daha yaxşı başladıq və daha yaxşı oynadıq. Yekunda da layiqli qələbə qazandıq.  Oyunçularımı qələbə münasibətilə təbrik edirəm! Yenə də kimisə ayırmaq istəmirəm, hər biri yaxşı oynadı".

O, IV turda "Sumqayıt"la oyun barədə də danışıb: "Məncə, "Sumqayıt"la oyuna daha ciddi yanaşmalıyıq. Çünki bugünkü görüşdə mən oyunçularımda bir az arxayınlıq, özündənrazılıq hiss etdim. Ancaq bu oyun da göstərdi ki, Azərbaycan çempionatında heç bir komanda ilə rahat oyun olmayacaq. Uşaqlara da hər oyunun belə çətin olacağını söylədim. Baxmayaraq ki, azərbaycanlı oyunçular hansısa komandada bir az zəif ola bilər, amma rəqib komandaların hamısı meydana qələbə üçün çıxır. "Sumqayıt"la oyunun məşqlərinə 1-ci gündən başlayacağıq. "Sumqayıt"la daha ciddi oynamalıyıq, çünki çox yaxşı komandadır. Meydana yalnız qələbə üçün çıxacağıq".